Lau urte eta erdiko espetxe zigorra ezarri diote Irungo irakasleari
"16 urtetik beherakoei hurbilketa sexuala eta baldintzapeko mehatxuak" egitea egotzi dizkio Gipuzkoako Auzitegi Nagusiak.
Oiartzungo Feministen Asanbladak Donostiako epaitegiaren aurrean egindako elkarretaratzeko irudi bat. Oiartzungo Feministen Asanblada Gipuzkoako Probintzia Auzitegiak lau urte eta erdiko espetxe zigorra ezarri dio Irungo ikastetxe bateko irakasle bati “16 urtetik beherakoei hurbilketa sexuala eta baldintzapeko mehatxuak” egitea egotzita.
Halaber, auzitegiak hogei eguneko lokalizazio iraunkorreko kondena ezarri dio “sexu jazarpen delitu arin batengatik”, bai eta lau urteko zaintzapeko askatasuna ere espetxe zigorra amaitu ondotik. Gaur gaurkoz, epaia ez da irmoa, eta Euskal Autonomia Erkidegoko Justizia Auzitegi Nagusian helegitea jartzeko aukera dago.
Gipuzkoako Auzitegiko Lehen Sekzioak dio egiaztatu egin duela akusatua lanean ari zen ikastetxeko hiru ikaslerekin harremanetan jarri zela 2023-24 ikasturtean sare sozial batean sortu zuen kontu faltsu batekin. Era berean, diote elkarrizketak modu barregarrian izanik ere izaera sexuala zutela. Gainera, diote bi kasutan aurrez aurrez elkartzeko “proposamen serioak” egin zituela, baina horiek ez zirela burutu beste gauza batzuen artean kasua ikastetxeko zuzendaritzara iritsi zelako.
Horretaz gain, auzitegiak aitortu du pisu handia izan dutela epaiketetan adingabeen mugikorrek, horietan lortutako “ebidentzia digitalek” eta horien “kontakizun sendo eta iraunkorrek garrantzia handia” izan dutelako “akusatuaren errugabetasun presuntzioa indargabetzeko garaian”. Era berean, ikastetxeko zenbait irakasleren testigantzak ere balioan jarri dituzte. Hori horrela, auzitegiak errefusatu egin ditu akusatuaren alegazioak, zeinak epaitutako gertakarien ustezko biktimak deklaratu zuen bera zela “adingabeen desira objektu”.
Hori gutxi balitz, auzitegiak frogatutzat jo du “jazarpen delitu arina” egin zuela adingabeetako batekin, internet bidezko elkarrizketa batean nerabeari haren bizilekuaren helbidea eskatu baitzion.
Bestalde, Gipuzkoako Auzitegiak baldintzapeko mehatxuen delituengatik zigortu du irakaslea, frogatu baitu irakasleak mezu elektroniko bat bidali ziela zentroko zenbait ikasleri ohartaraziz haien mugikorreko elkarrizketa guztiak ezabatzen ez bazituzten “salaketa jarri” eta “poliziak berak esandako mugikorrak arakatuko zituela”.
Era berean, diru edota opari truk sexu mesedeak egitea eta jendaurrean sexu erakustaldiak egitea delituak ere egozten zikioten, baina epaileak adierazi du ez dagoela froga nahikotik hori ziurtatzeko.
