Xanistebanetako kartel lehiaketa, martxan
Maiatzaren 29a izango da lanak aurkezteko azken eguna, eta teknika librea da. Bost sari banatuko dituzte parte hartzaileen artean.
Oiartzungo Udaleko kultura batzordeak abiatu du Xanistebanetako kartel lehiaketa. Bertan edonork har dezake parte, eta nahi beste lan aurkez daitezke. Gainera, teknika librea da; alegia, argazkia, pintura, collagea… edozer izan daiteke. Alabaina, lanek ezinbestean bi baldintza bete beharko dituzte: Xanistebanak 2026 leloa agertzea eta 70×50 zentimetroko kartela izatea.
Kartelak izenik gabe aurkeztu beharko dira, eta kartazal itxi bat entregatu beharko da aparte, egilearen datuekin. –Hemen daude oinarri guztiak–.
Horretaz gain, bost sari egongo direla aurreratu dute:
- Irabazleak 600 euro jasoko ditu.
- Lehen oiartzuarrak 300 euroko akzesita eskuratuko du. Irabazlea oiartzuarra bada, saria hau bigarren oiartzuarrari emango zaio.
- Saririk jasotzen ez duten bi original onenei 50 euroko laguntza emango zaie.
- Haur eta gaztetxoen artean, 100TZE Sormen Espazioko urtebeteko doako matrikula zozketatuko da.
Proposamenak Oiartzungo Udalaren Herritarren Arreta Zerbitzuko bulegoan aurkeztu beharko dira, eta maiatzaren 29a izango da horretarako azken eguna. Aurkezten direnen artean herriko jai batzordeak aukeratuko du festak iragarriko dituen kartela zein izango den eta baita beste sariak zeinentzat izango diren ere.
