Irrintziak ekarri du festa
Sagardo Eguna hasi da eta jende andanak bete du goizeko agertoki bihurtu den Foru plaza; sagardoa erruz, giro paregabea ere.
Ereintzako dantzariak goizeko txotxaren aurretik, Foru plazan. Sagardoa protagonista da gaur. Foru plaza hartu du goizean, baina erdialdeko kale eta bazter denak zipriztintzen ari da Sagardo Eguna. Dultzainero, trikitilari, dantzari, txistulari, joaldun eta astoa kupela gurdian ari dira goizetik herria girotzen. Udal Txistulari Taldeak jarri dio goizeko txotxari soinu banda, beti bezala bikain, eta Ereintzako dantzariek berriz, sagar dantza egin dute, horiek ere maisuki. Aurtengo omenduen izenean aitortza jaso zuten Antton Retegi eta Jokin San Sebastian, Egiluze eta Donosti sagardotegikoak, hurrenez hurren, goizetik egin dute bat jaiarekin.
Guztiei begira jende andana. Goiz goizetik egin dute bat Sagardo Egunarekin dozenaka eta dozenaka herritar, adin guztietakoak, eta ilarara batu Sagardo Eguneko kita —edalontzia, pintxorako txartela eta zozketa boletoa— erosteko. Ez dadila larritu inor, arratsaldean ere izango baita erosteko aukera.
12:00etan puntuan hasi dute ekitaldia eta antolakuntzaren izenean, Idoia Arbelaitz mintzatu da. Azaldu du 11 sagardotegietako uzta dastatzeko aukera izango dutela bertaratzen direnak gaur Errenteria-Oreretara. Eskaera nagusi bat egin die Arbelaitzek Sagardo Egunaren bueltara batuko diren horiei guztiei: “Gozatu! baina gozatzeaz gain, elkarrekiko errespetua zaindu”. Gozatzeko eguna da zalantzarik gabe sagardoari emandako apirileko azken larunbata. Deia ere, euskaldun izan daitezen, euskara ahoan erabil dezaten jaian direnek, “gaur, eta urtearen gainontzeko egunetan ere”.
Irrintzia heldu da ondoren; eta irrintziarekin batera hasi da festa, aurten ere handia izango den ospakizuna, zalantzarik gabe. Handi egiteko antolatzaile andana, boluntarioak denak, eta dozenaka eta dozenaka laguntzaile. Horiei esker heldu da hogeita hemezortzigarrenera, eta belaunaldi gazteen inplikazioa ikusita luzerako du bidea.
Eguerdira arte sagardoa dastatu eta musikarekin gozatzeko aukera izango da, eta tartea eginda, arratsaldez egingo dute bigarren txotx handia, Zumardian hori, 18:00etan.
