Kirol arrantza berraktibatu da Pasaiako portuan
Euskadiko Arrantza eta Kasting Federazioak eta Pasaiako Portu Agintaritzak baimena eman dute gaitutako eremuetan federatutako arrantzaleek arrantza egin ahal izateko.
Euskadiko Arrantza eta Kasting Federazioak eta Pasaiako Portu Agintaritzak (PPA) Pasaiako portuko kirol arrantza berraktibatu dute, bi aldeek lortutako akordio bati esker. Sistema digital berri baten bidez, arrantzale federatuek banakako, eguneko eta jarduerarako mugatutako eremu zehatzetarako baimenak eskuratu ahal izango dituzte orain.
Lehen eremuak San Pedroko eta Donibaneko kaiak hartzen ditu, eta kolektibo espezifikoentzat izango da soilik, hala nola, arrantzale erretiratuentzat, desgaituentzat eta 16 urtetik beherakoentzat, federazio lizentzia duen heldu batek lagunduta joan behar baitute.
Bigarrena, aldiz, kirol arrantzale federatu guztiei irekita dago, eta San Pedroko ontziralekutik Mendebaldeko bantxako arroketarainoko eta Bizkaia plazatik Donibaneko itsasargirainoko eremuak hartzen ditu.
Lehenengo gunean 25 kirol arrantzaleren edukiera ezarri da gehienez, eta jarduera 06:00etatik 24:00etara bitartean egin ahal izango da. Horrez gain, San Pedroko Torreatzetik Gurutzeta lurmuturreko itsasargirainoko arrantza eremuan, 25 pertsonentzako gehieneko edukiera ezarri da, ordu mugatzailerik gabe. Azkenik, Bizkaia plaza eta Arando handiko itsasargiko tartean gehienez 30 arrantzale egon ahal izango dira, hemen ere ordutegi mugatzailerik gabe.
Gaitutako portu eremuetan arrantza egiteko, honakoak beharko direla jakinarazi dute erakundeek: NANa, Eusko Jaurlaritzak emandako kirol arrantzako lizentzia, Eusko Arrantza eta Kasting Federazioak emandako federazio lizentzia, Federazioaren ehiza barrutien programak emandako baimen txartela eta erantzukizunpeko adierazpen. Eskatzaileek Euskadiko Arrantza eta Kasting Federazioaren ehiza barrutien programan sartu beharko dute.
“Akordio honi esker, kirol arrantzaren zale amorratuei alternatiba seguruak ematen dizkiegu jarduerarako, Pasaiako kaietan kudeaketa ordenatua bermatzen duen sistema baten bidez”, adierazi du Izaskun Goñi PPAko presidenteak.
