Legamia, arte biziak harrotzeko
Legamia beka deialdia zabaldu du Errenteriako Udalak arte bizien sorkuntza eta bitartekaritza sustatzeko.
Legamia Beka 2021ean sortu zuen udalak.Herri bizia Arte bizien sorkuntza eta bitartekaritza sustatzeko Legamia beka sortu zuen Errenteriako Udalak, eta aurten ere zabaldu du deialdia. Antzerki, dantza, zirku eta performance sorkuntza eta ikerketa prozesuak babestea du helburu beka horrek, eta egonaldi, bitartekaritza eta programazioa hartzen ditu bere baitan, Errenteria-Oreretan errotutako eta bertan eragina duten proiektu artistikoak sustatu nahi dituela azaldu du udalak, “sortzaileei euren lanak garatzeko baliabideak eta testuingurua eskainiz”.
Legamiaren ezaugarri bereizgarrienetako bat “bitartekaritza dimentsioa” dela gaineratu du tokiko erakundeak. Izan ere, bekarako hautatutako proiektuek Errenteriako kultura sailarekin, horren bitartekaritza taldearekin, edota tokiko komunitate batekin elkarlanean ekintza bat ondu beharko dute egonaldian edota emanaldiarekin batera garatzeko.
Deialdian Euskal Herriko zein nazioarteko pertsona fisikoek, pertsona juridikoek, edota pertsona fisikoen taldeek parte har dezakete. Eskaera, berriz, aurrez aurre egin daiteke Zu! zerbitzuan udaletxean, edota Aldakoenea eraikinean; postaz, herriko Plaza z/g 20.100 Errenterian; edo online, erregistro elektronikoaren bidez. Eskaerak egiteko epea, berriz, hilaren 24an zabaldu zuten eta maiatzaren 22ra arte izango da indarrean. Prozesuaren ebazpena gehienez sei hilabeteko epean jakinaraziko da—aurreikusitakoa, 2 hilabete da—.
Informazio gehiagorako 943 44 96 34 telefono zenbakira deitu edota posta elektronikora mezua bidal daiteke (klik hemen).
Aurkeztu beharreko dokumentazioa
• Izena emateko formularioa
• Nortasun agiria, IFK edo IFZa
• Banku kontuaren titulartasun ziurtagiria
• Proiektuaren azalpen txostena (laburpena, behar teknikoak eta lan-plana)
• Bitartekaritza proposamen laburra
• Konpainiaren eta partaideen curriculuma
• Zinpeko deklarazioa, non beste sail, erakunde, organismo, eta abarrei egindako diru laguntzen eskaerak jasoko diren, edo, hala badagokio, eman zaizkien diru laguntzak.
• Euskarak eta berdintasunak zein tratamendu izango duen jardueraren hedapenean.
• Dosierra, teaser bideoa edo bestelako material osagarria (aukeran).
