Gozamen hutsa dira Herri Olinpiadak
Herri Olinpiaden bigarren jardunaldian, herri osoan zehar pista jolasean ibili ziren parte hartzaileak. Lezo ederki asko girotu dute.
Larunbateko proban parte hartu zutenen talde argazkia.Lezoko Komite Olinpikoa 2026ko Lezoko Herri Olinpiaden bigarren jardunaldia egin zuten larunbatean. Gozamen hutsa izan zen. Parte hartu zuten zortzi taldeetako ordezkariek hilketa bat argitu behar izan zuten, Cluedo erako pista jolas baten bitartez. Pista horiek herritik zehar bildu zituzten taldekideek, herriko txokoak, historia, pertsonaiak eta bestelakoak ezagutuz Agian konturatu gabe, euskal giroa ere plazaratu zuten larunbatean parte hartzen izan ziren dozenaka lezoarrek.
Pozik dira antolatzaileak bigarren egunak ere emandakoarekin. “Nork hil du Ihintza?”. Galdera horri erantzuna eman behar zioten partaideek larunbateko jolasean. Lehenik, Gezalan, gertakarien azalpen antzeztua jaso zuten taldekideek, eta ondoren hasi ziren herritik zehar pista bila, galdetzen, apuntatzen, ondorioak ateratzen, ikerketa lana egiten.
“Harro sentitzen gara taldeek egin zuten lanaz”, esan dute antolakuntzako, edo Komite Olinpikoko kideek: “Mila esker berriro Lezoko Olinpiadetan parte hartzen duten guztiei. Ikusi da, bai, badagoela gozatzeko gogoa”. Hurrengo jardunaldia, hirugarrena, maiatzaren 16an egingo dute.
Larunbatean, Al-Dekhflipau taldea izan zen garaile, hau da, ikerketa lana hobekien eta azkarren egin zuen taldea hura izan zen. Ondoren Perretxikuak, Errefusa, Pronponpon, Bidea Gara, 2kaña, Lez Go! eta Beatzi Gau sailkatu ziren.
Probaren ondoren bazkari autogestionatua egin zuten, eta gero, kalebuelta elektrotxarangarekin.
Bi jardunaldien ondoren, ordea, honakoa da sailkapen orokorra:
- 1. Al-Dekhflipau, 170 puntu.
- 2. Bidea Gara, 140 puntu.
- 3. Errefusa, 110 puntu.
- 4. Perretxikuak, 100 puntu.
- 5. 2kaña, 100 puntu.
- 6. Pronponpon, 90 puntu.
- 7. Beatzi Gau, 90 puntu.
- 8. Lez Go!, 80 puntu.
- 9. Sugarrak, 10 puntu.
- 10. Kosto de Marfil, 0 puntu.
Jarraian, Lezoko Komite Olinpikoak emandako argazkiekin, larunbateko irudi sorta.
