Haurrek euskaraz jolasteko aukera izango dute Pasaian
Parketarrak egitasmoa Pasaiako parke eta plazetara itzuliko da hirugarrenez. Udaberriko txanda maiatzaren 7tik ekainaren 4ra bitartean izango da, lau barrutietan.
Parketarrak egitasmoa Pasaiako parke eta plazetara itzuliko da. Euskaraz jolasean aritzeko iniziatiba da Parketarrak, eta udaberriko txanda maiatzaren 7tik ekainaren 4ra bitartean izango da. Saioak lau barrutietan egingo dira, astelehenetik ostegunera, arratsaldez, eta lau astez jarraian. Barruti bakoitzean saio bana egingo da astean, eta orotara, lau egingo dira horietako bakoitzean. Egitasmoaren lehen saioak Eusferaren programazioaren barruan antolatuko dira. Eusfera maiatzaren 7tik 17ra bitartean gauzatuko den iniziatiba da, eta bere helburua da gurasoak aktibatzea, haurren unibertsoa euskaldunagoa izateko.
Honakoa Parketarrak egitasmoaren hirugarren ekitaldia izango da. Lehena 2025eko udaberrian egin zen, eta bigarrena urte bereko udazkenean. Bigarren edizioan 71 gurasok eta 190 haurrek hartu zuten parte. Aho zapore ona utzi ondoren, Bokale Pasaiako Euskararen Aholku Batzordeak iniziatibari jarraipena ematea erabaki du, hirugarren ekitaldia antolatuta.
Parketarrak-en helburua nagusia da “familia bidezko transmisioan eragitea”, eta horretarako, haurrak eta gurasoak elkarrekin euskaraz jolastu daitezen espazioak sortzen dituzte Pasaian. Aurreko edizioetan bezala, familiak barrutietako parkeetan eta plazetan bilduko dira euskaraz jolasteko. Egitasmoa 3 eta 5 urte arteko haurrak dituzten familiei begirakoa da. Jarduerak hezitzaileek dinamizatuko eta gidatuko dituzte. Hala ere, sustatzaileek adierazi dute “ezinbestekoa” dela haurrekin gurasoek edo arduradunek ere parte hartzea, haiek baitira haur horien erreferentziazko pertsonak.
Saioak doakoak izango dira, eta ordubeteko iraupena izango dute. Kide kopuruari dagokionez, ez da parte hartzaile mugarik jarriko eta ez da izen ematerik egin beharko. Hezitzaileek inguruan dauden 3 eta 5 urte arteko haur guztiak eta haien gurasoak gonbidatuko dituzte parte hartzera.
Hezitzaileek, gainera, parte hartzaileen ezaugarrien arabera moldatuko dituzte saioak. Topaketa guztiak euskaraz izango dira, baina parte hartzeko ez da beharrezkoa euskaraz ulertzea, hezitzaileak arduratuko baitira partaideek jolasen azalpenak ulertu dituztela bermatzen. Taldearen ezaugarrien arabera, hezitzaileek aproposenak diren jolasak prestatuko dituzte.
Saioak
Donibaneko saioak astelehenetan izango dira, JJ Otaegi plazan, 17:00etan. Euriarekin frontoira lekualdatuko lituzkete jarduerak. Asteartetan Antxon bilduko dira, Ibaiondo plazan, 17:30ean. Barruti arrosan bezala, euriarekin frontoira lekualdatuko lirateke. Asteazkenetan San Pedroren txanda izango da. Barruti moreko jarduerak frontoian izango dira, 17:30ean. Euriarekin Proisako aterpera mugituko lirateke. Azkenik, Trintxerpen ostegunetan elkartuko dira jolasteko. Jarduerak Gudari plazako parkean egingo dituzte, 17:15ean. Euriarekin Serafin Esnaola plazako arkupeetara lekualdatuko lirateke.
