Artisautzak bete du Merkatuzar
Goizean goiz, jende andana bildu da Azo!ka Artisautza Topagunean, eta bigarren egunerako 800 lagun inguru pasa dira Merkatuzarretik.
Lehenengo ordutik jende ugari bildu da Merkatuzarren.Gorka Correyero Llamas Beste urte batez, artisautza lehen lerroan jarri dute Errenteria-Oreretan. Azo!ka Artisautza Topaguneak Merkatuzarreko aretoa jendez bete du, eta bihar, hilak 3, eguerdira arte aukera izango dute herritarrek eskuz egindako produktuak gertutik ezagutzeko eta erosteko. Antolatzaileak oso pozik daude orain arte izan duen harrerarekin, eta atzo, hilak 1, 800 lagun inguru pasa zirela nabarmendu dute. “Azokaren lehenengo egunean aurreikuspenak bete genituen, eta oraindik bi egun gehiago falta zaizkigu. Hortaz, oso pozik gaude jendearen erantzunarekin”.
11:00etan ireki, eta lehenengo ordutik herritar ugari gerturatu dira larunbat goizean. Artisautza erdigunean jarri dute, eta egurrezko erakusmahaietan produktuen eskaintza zabala jarri dute salgai. Artisauen irribarreek bat egin dute herritarren irribarreekin, eta Merkatuzarrera bertaratu diren ia gehienek eskuan poltsa bat daramatela atera dira. Zeramika, jertseak, txapelak, xaboiak, egurrezko apaingarriak, haurrentzako jolasak, agendak, kamisetak, bitxiak… denetarik erosteko aukera dute.
Erakusmahaiez gain, egunean zehar hainbat tailer eta bestelako jarduera egingo dituzte. Lagunartean ehuntzen jardueran dozenaka emakume bildu dira, eta norbere kabuz ehun askoren artean aritu dira goiz pasa. Arratsalderako, Petlotas Ardik 30 minutuko lau tailer antolatuko ditu, 16:30etik 18:30era. Tailerra amaitzean, Xenpelar Tailerrak Harizko korapiloak tailerra antolatuko du, 20:30ak bitarte.
Bihar goizean ere, herritarrek aukera izango dute Merkatuzarrera hurbiltzeko, eta beste hainbat jardueratan parte hartzeko. 11:00etan hasi eta 14:00etan azoka itxi bitarte, amuleto bat sortzeko edota Haria ez dadila eten podcasta entzuteko aukera izango dute.
Jarraian, HITZAk goizean zehar Merkatuzarren ateratako argazki sorta:
