Antxoko sanferminak, kartel bila
Aurtengo jaiak uztailaren 3tik 8ra izango dira, eta horiek iragarriko dituen irudia aukeratzeko lehiaketa abiatu dute.
Uda gerturatzen ari da, eta horrekin batera herrietako jaiak. Antxoko sanferminak uztailaren 3tik 8ra bitartean izango dira, eta kartel bila ari dira. Jaien irudia aukeratzeko lehiaketa abiatu du Pasaiako Udalak, eta txapelketa hori irabazten duen lanak iragarriko ditu 2026ko San Fermin jaiak. Horrez gain, festetako egitarauaren azala ere izango da.
Lehiaketan parte hartzeko beharrezkoa da Pasaiakoa izatea edo udalerrian bizitzea. Lanak DIN A3 neurrian aurkeztu behar dira. Edozein modalitate artistiko balia daiteke, baina beharrezkoa da kartelean San Fermin Jaiak-Pasai Antxo 2026. Uztailaren 3tik 8ra esaldia agertzea. Kartelean ez da egilearen sinadurarik edo bestelako zehaztasunik jarriko. Kartelarekin batera, gainera, kartazal itxi bat aurkeztu beharko da, egilearen izen-abizenak, helbidea eta telefono zenbakia zehaztuz.
Lanak hilaren 20a baino lehen aurkeztu behar dira, Pasaiako Udaleko Kultura eta Hezkuntza Sailean (Euskadi Etorbidea 61, Trintxerpe. Udal Euskaltegiaren ondoan) edo Antxoko HAZ bulegoan (Hamarretxeta 24).
Antxoko Jai Batzordeak aukeratuko du kartel irabazlea, eta hutsik uzteko gaitasuna izango du. Kartel irabazleak, gainera, Laurak Bat elkartearen bonuak irabaziko ditu, 200 euroko balioa izango dutenak.
Saritutako lana Jai Batzordearen esku geratuko da. Sarituak ez direnen egileak, aldiz, Kultura eta Hezkuntza Sailean jaso ahal izango dituzte beren obrak.
