Ander Fernandezen 'Itzulera' soinu banda, Musika Bulegoa sarietan
Orotara 45 lehiakide daude sariketarako, eta Fernandezek Dejaburen 'Itzulera' lanerako ondutako soinu banda da horietako bat. Eman daiteke bozka.
Musika Bulegoa sarien hamargarren edizioa ospatuko dute ekainaren 4an Biarritzen, eta beraz, irekita dago hautagaien artean gustukoena bozkatzeko epea.
Orotara 45 lehiakide daude, eta, tartean, Oarsoaldeak badu bere txokoa, Ander Fernandez izendatuta baitago Dejabu konpainiaren Itzulera antzerkirako sortutako izen bereko soinu bandagatik. Publikoak bozkatzeko epea zabaldu dute orain, eta pozik agertu da horren aurrean oreretarra: “Egia da ilusioa egiten duela hor egoteak. Publikoaren bozkarako epea zabaldu dute orain, eta jarraipen horrek ilusioa egiten dit, nolabait egindako lana argitara ateratzen laguntzen baitu horrek. Nolabaiteko oniritzi bat sentitzen dut. Finean, plazera da”.
Publikoaren sariez gain, epaimahaiak ere ematen ditu zenbait sari, eta hori nola bizi duen ere kontatu dio Fernandezek HITZAri: “Soinu banda batek baino askoz zabalkunde handiagoa duten disko eta taldeak daude lehian, baina ilusioa berdin berdin egiten du hor egoteak”.
Esteka honetan eman daiteke Fernandezen aldeko botoa.
