Oihartzuna murrizteko lanak egin dituzte beilatokian
Beilatokiko egonaldia "ahal bezain goxoena eta lasaiena" izateko egin dituzte lanak, eta aurrera begira esku hartze gehiago egitea aurreikusi dute.
Oiartzungo Udalak jakinarazi duenez, beilatokiaren sarrerako aretoaren sabaia berritu dute “barruan jendea pilatzean burrunba sortzen baitzen oihartzunagatik”. Hartara, egin berri dituzten lanekin burrunba ekidin eta beilatokiko egonaldia “ahal bezain goxoena eta lasaiena izatea” nahi dute.
Astebetez itxita egon da gunea, eta apirilaren 20az geroztik, martxan da berriz. Hala ere, datozen hilabeteetarako udalak beste hobekuntza lan batzuk aurreikusi ditu; hala nola, beiratea eguzkitatik babestea berotegi efekturik sor ez dezan, edota klimatizazio eta aireztatze sistema berritzea.
Beilatoki baten beharrari erantzunez
2011z geroztik hilerriaren alboan dago beilatokia, orduan itxi baitzuten San Esteban elizaren atzealdeko gunea. Olaia Lasa Olaziregi, alkateordea: “Elizaren atzealdeko gela elizari eta, beraz, erlijioari lotzen zitzaion; txikia, iluna hotza, beilatzeko prestatu gabea zen eta irisgarritasun arazoak zituen”.
Udalak beilatoki berri baten beharra zegoela ondorioztatu zuen orduan, eta diru laguntza bati esker eraiki zuten gaur egungoa. “Kudeaketa enpresa pribatuen eskuetan uzteko aukera izan zen, baina udalak bere esku hartzea erabaki zuen hori egitea etorkizuneko ikuspegiz jokatzea zela sinetsita. Heriotzak tabu izateari uzteko, naturalizatzeko, herritarrek behar duen beste zerbitzu publiko baten gisa tratatzeko eta pertsonen ongizateari lotzeko bidean aurrerapauso bat zela sinetsita”.
Heriotza eta dolua lantzen dituztenei aitortz
Oiartzunen hainbat dira heriotza eta dolua lantzen dituzten elkarte eta eragileak; horren adibide Abaraxkak antolatzen duen Hilen Eguna. Gau Beltzaren bueltan ere egiten dute lanketa ludotekak eta Zaintzadik, eta Esku Hutsik elkarteak gaiaz “goxo eta naturaltasunez” aritzeko jardunaldiak antolatzen ditu.
“Udalak eskerrak eman nahi dizkie gaiari plaza eskaini eta lantzeko aukera ematen duten eragile guztiei, elkarlanean Oiartzunek aurrera egiteko beste alderdi bat baita”, amaitu du Lasak.
