Pasai Antxo korrikalarien herria dela erakutsi du Moliño Trail mendi lasterketak
Larunbatean, Moliño Trail mendi lasterketa egin zuten ehunka korrikalarik, Ibaiondo pilotalekuan hasi eta bukatu zuten 12 kilometro eginda.
Lezo Jaizkibel, Landarbaso, Intxixu… asko dira Oarsoaldean egiten diren mendi lasterketak. Antxotarrek ere berea izan zuten estreinakoz: Moliño Trail. Larunbat goizean, 200 korrikalari inguru aritu ziren gora eta behera Antxoko berdeguneetatik barrena. 12 kilometroko ibilbidea egin behar izan zuten Ibaiondo pilotalekutik San Marko mendira bidean, gero berriro ere irteera gunera ailegatzeko. Ibai Makazaga orioarra eta Irati Garro tolasarra izan ziren azkarrenak lasterketaren lehenengo edizioan. Antxotarrek ere euren sailkapena izan zuten: Gorka Simon eta Maitane Gomez izan ziren lehenak. Eguraldia lagun, lokatz askorik gabeko ibilbidea egin zuten korrikalariek, aurreko eguneko euriteek ez zuten eragin larririk izan.
Korrikalariek egindako denbora alde batera utzita, giro bikainean ospatu zuten Antxoko Topaguneak antolatutako mendi lasterketa. 12 kilometrotan botatako izerdia errekuperatzeko txorizo pintxoak eta edariak izan zituzten Ibaiondo pilotalekuan. Herri bazkaria eta Tapia eta Leturiaren kontzertuak jarraipena eman zion goizean goiz hasitako egunari. Eguna borobiltzeko Joselontxos txarangak herria girotu zuen eta pasaitarrek ezin hobeki amaitu zuten lehenengo Moliño Trail lasterketa. Sailkapena osorik hemen.
Emakumeen podiuma
- 1. Irati Garro Arrieta (Tolosa) 1.02.47
- 2. Nerea Garcia Larrañaga (Donostia) 1.03.21
- 3. June Muxika Legorburu (Ordizia) 1.06.37
Gizonen podiuma
- 1. Ibai Makazaga Aristi (Orio) 48.19
- 2. Oier Arriztio Mansilla (Errenteria) 50.01
- 3. Garikoitz Bravo Oyaralde (Donostia) 50.52
Antxotar azkarrenak.
- Emakumeen artean: Maitane Gomez Cruz 1.07.11 (laugarren izan da emakumeen sailkapen nagusian).
- Gizonen artean: Gorka Simon Olea 53.23 (bosgarren izan da gizonen sailkapen nagusian).
Jarraian, HITZAk Ibaiondo pilotalekuan jarritako helmugan ateratako argazkiak:
