Bianditz - Domiko bizirik taldeak deituta, jardunaldiak
Hilaren 20tik aurrera, hitzaldiak eta mendi irteera antolatu dituzte. Hilaren 23an 'Makroproiektuaren aurka' manifestaziora joateko deia luzatu dute.
Urtarrilaren amaieran Repsol parean egin zuten elkarretaratzea. Hilaren 20an hasita eta Bianditz-Domiko bizirik egitasmoak deituta, jardunaldiak egingo dituzte Oiartzunen. Zain dezagun Aiako Harria parke naturala lelopean antolatu dituzte jarduerak, eta zenbait hitzaldi antolatu dituzte gaiaren inguruan sakontzeko. Horretaz gain, hilaren 23an Gasteizen egingo den Makroproiektuaren aurka manifestaziora joateko deia ere luzatu dute. Horretarako, autobusak antolatu dituzte herritik, eta ikastolako aparkalekutik irtengo dira hala nahi dutenak. Autobusa 15:00etan abiatuko da Oiartzundik, eta 15:30ean geldialdia egingo du Errenterian.
Bestalde, hilaren 24an egingo duten Hegaztien behaketa irteeran parte hatzeko gonbita ere luzatu dute Bianditz-Domiko bizirik egitasmotik. Egun horretarako bi hitzordu antolatu dituzte: batetik, 9:30ean Oiartzungo plazan elkartuko dira kotxea partekatu nahi dutenek, eta, bestela, 10:00etan Aritxulegin izango da topaketa.
Hona hemen jardunaldietako egitaraua, osorik:
- Hilak 20, 18:30. Oiartzungo Udaleko areto nagusian.
- Bianditz-Domiko. Pasaia megalitikoa. Manu Zeberio eta Jesus Tapia, Aranzadiko arkeologoak.
- Hilak 22, 18:30.
- Udaleko areto nagusian. Energia berriztagarriak hedatzeko eredua. Raoul Servet. Geomorfologoa, eta masterra lurralde antolaketan, ingurumenean.
- Hilak 27, 18:30.
- Ondare naturala eta biodibertsitatea. Egoitz Alkorta Miranda, Aranzadiko zientzia elkarteko Herpetologia saila.
- Hilak 29, 18:30.
- Energia berriztagarriak bai, baina ez non nahi eta nola nahi. Iñaki Barcena, EHUko irakaslea.
