Oiartzun Donostiako ospitaleekin eta Miramonekin lotuko ditu autobus linea berri batek
Irailaren 1ean jarriko dute zerbitzua martxan, eta egunean hamabost bidai egingo ditu noranzko bakoitzean.
Azahara Dominguez Mugikortasuneko, Turismoko eta Lurralde Antolaketako diputatuak jakinarazi duenez, irailaren 1etik aurrera Oiartzunek Lurraldebus linea berri bat izango du herria Donostiako ospitale eremuarekin zein Miramongoko teknologia parkearekin lotzeko.
Diputatuak azaldu duenaren arabera, linea berri hori martxan jartzea bultzatu duen gauzetako bat izan da “kanpoko kontsulten eraikin berriaren obrek eta aparkatzeko aukerarik ez izateak sortu duen egoera”. Gainera, gehitu dute Osakidetzako langile talde batek egindako eskaera dela autobus linea hori jartzea.
Dominguez: “Badakigu linea hori oso beharrezkoa dela osasun arrazoiengatik ospitalera joan behar duten pertsona guztiei emango dielako zerbitzua, eta, gainera, Ospitaleko eta Miramongo teknologia parkeko langileei aukera jasangarria, erosoa eta eskuragarria eskainiko die beren lanpostuetara iristeko”.
Linea berria, “mugarri”
Lineak hamabost bidai egingo ditu noranzko bakoitzean –ez dute ordutegia argitaratu–, egunero. Ospitaleetako noranzkoan Oiartzunen hamar geldialdi egingo ditu, Errenterian bost, eta bederatzi Donostian. Haatik, kontrako noranzkoan, bederatzi geldialdi egingo ditu Donostian, bost errenterian eta bederatzi Oiartzunen. “Lineak langileak txanda aldaketara garaiz iristeko pentsatutako ordutegiak ditu, eta, horrela, zerbitzu erabilgarria eta pertsonen mugikortasun behar errealetara egokituko da”.
Diputatuak dioenez, linea berri hori “mugarria” izango da oiartzuarrentzat; “azkenean, garraio publikoko konexioa izango dute ospitaleetara eta Miramonera iristeko”.
