"HITZA-k beti argitaratzen ditu egiten ditugunak"
Egiten dituzten emanaldi guztien berri ematen diote OARSO BIDASOKO HITZA-ri Lezoko Dantzazaleak taldekoek. Hedabideak herrietan dituen laguntzaile edo konplize sarearen eredu da bertako kide Alberdi.
Dantzari beteranoek osatzen dute Lezoko Dantzazaleak taldea. Herrian festak diren bakoitzean euren ekarpena egiten dute, izan mendekosteak, santakrutzak, San Tomas festa, edo inauteriak. Bestelako data berezietan ere egiten dituzte aktuazioak. Gurutze Alberdi taldearen sortzailea da. Egiten dituzten emanaldi guztien berri ematen dio OARSO BIDASOKO HITZA-ri. Hedabideak herrietan dituen laguntzaile edo konplize sarearen eredu da Alberdi.
Zergatik zarete etxean HITZAkide?
Hasieratik gara HITZAkide. Argi genuen euskararen alde, herriaren alde egitea dela Hitza-ren harpidedun izatea, eta ez genuen zalantzarik izan. Beharrezkoa zela uste genuen.
Zer abantaila ditu zure ustez HITZA-ren harpidedun izateak?
Niretzat abantaila asko ditu. Nire kasuan, adibidez, nire euskara maila ez da oso altua. Aritzen naiz, bai, baina batzuetan ez nahi bezala. Beraz, Hitza irakurtzeak asko laguntzen nau hizkuntzarekin aurrera urratsak egiten, nire euskara maila hobetu eta mingaina gehiago askatzeko. Gainera, herriko informazioa ematen du.
Lezoko Dantzazaleak taldeko kide zara. Fidel-fidel bidaltzen duzue HITZA-ra egiten duzuen guztia…
Oso gustura egiten dugu hori. HITZA-k beti argitaratzen ditu egiten ditugunak. Guk badakigu zer egiten dugun, baina garrantzitsua iruditzen zaigu herriak eta herritarrek jakitea zertan ari garen.
Dantzari beteranoak zarete.
Hamazazpi urte daramatzagu martxan, eta bai, Lezoko Dantzazaleak-eko partaide gehienak adi jakin batetik gorakoak gara. Lezoko festa guztietan parte hartzen saiatzen gara, eta beterano izan arren, sekulako ilusioarekin ari gara. Nik erakusten dizkiet dantzak taldekideei, 60 urtekoak, 70ekoak, edo 80 urtekoak dauzkagu taldean. Badago erreleboa, gainera. Plazetan dantza egiteko aukerarik ez zela uste izan nuen, eta taldea sortzeari ekin nion. Festa giroan jendea dantzatzen jartzea da gure helburua, berdin du ondo dantzatu ala ez. Plazako dantzen ohitura eta gure kultura ez dira galdu behar. Denentzat da dantza.
Zer du Lezok dantzarekin?
Sekulako tradizioa. Dantza taldeak daude, bakarkako lehiaketetan sekulako emaitzak lortzen dituzte bertakoek, gu ere bagaude. Herri txikia da, baina oso berezia. Berez oreretarra naiz, 30 urte daramatzat Lezon bizitzen. Baina dantzak herriari sekulako bizitza ematen dio.
Zuentzat herria egitea al da dantzan aritzea?
Lezokoentzat, herriarentzat sortu genuen Lezoko Dantzazaleak. Uste dut helburu hori betetzen ari garela.
Data berezirik dantzarako?
Maiatzean Tomas Garbizu Musika Eskolako bandarekin saio bat egiten dugu, mendekosteetan. Egun berezia izaten da hori guretzat, oso gustuko dugu. Baina esan dudan bezala, Lezon festak non, Lezoko Dantzazaleak han.
Taldekide guztiak boluntarioak zarete. Baina baduzue lana, ezta?
Hala da. Hemen inork ez du ezer kobratzen. Baina lana badago: emanaldiak antolatzea, jantziak, entseguak… Txikitan ikasi nituen euskal dantzak, eta inork ez zidan ezer kobratu. Hemen ere hala egiten dugu, dena borondatez.
