1.000: hori bakarrik, eta hori guztia
OARSOALDEKO HITZAren eta BEHE BIDASOKO HITZAren baturatik sortu zen 2010eko azaroan OARSO BIDASOKO HITZA. Hedabidearen papereko edizioa, egun astekari dena, 1.000 zenbakietara iritsi da sostengu zuzena eman dioten guztiei esker.
Bada esaten duenik zerbaitetan hastea erraza dela; horri eustea dela zailena. Hasierako ilusioarekin hazten segitzea, eguneroko bihurguneak saihestu baino, horiekin ikastea. OARSO BIDASOKO HITZA-ren lehen astekaria 2010eko azaroan banatu zen harpidedunen artean. Ordutik, lehenengo egunkari maiztasun eta itxurarekin, ondoren astekari eta aldizkari formatuarekin beste 999 zenbaki iritsi dira. Gaur mila. Karmele Mitxelena idazle oiartzuarrak lau zifrako kopuru honen ospakizunetarako prestatu duen testuan agertzen den bezala, 1.000 zenbaki, hori bakarrik, eta hori guztia.
Euskarazko tokiko informazioa ahalik eta jende gehien irakurtzen jartzea. OARSO BIDASOKO HITZA-ren misioa da hori. Xumetasunetik abiatuta, esan daiteke hori lortzen ari dela hedabidea. Datuek hala diote: CIES neurketaren arabera, 16.000 dira astero hedabidearen papereko edizioa (osoa edo zatiren bat) irakurtzen dutenak; Interneten, bestalde, iaz ia 400.000 bisitari izan zituzten bi webguneek, bidasoa.hitza.eus-ek eta oarsoaldea.hitza.eus-ek. Sare sozialetan ere presentzia oso nabarmena du hedabideak, dituenen artean milaka eta milaka dira jarraitzaileak… Datuak dira horiek, baina.
Datuez, zenbakiez gaindi, herritarren ahotsa jasotzen saiatu da, eta ahalegintzen da hedabidea. Sortzen dituztenak, arrakastak, ezustekoak, porrotak, irabazitakoak, galdutakoak… Batzuetan irribarrearekin, bestetan haserre, edo goibel. 1.000 zenbaki hauetan jasotako istorio eta bizipenak beste milaka izan dira, baina beti premisa batekin: jendearen, herritarren, eragileen, taldeen, erakundeek esandakoa jaso, eta euskaraz zabaltzea.
1.000 zenbaki horien testuen, argazkien, edo azken aldian askoz maizago egiten diren bideoen atzean pertsonak daude, langileak, kazetariak. Beti ez dugu asmatu. Baina beti gertatutakoei, errealitateari, edo iritziei zintzo eta fidel izaten saiatu gara.
Aldatu gara
Nor, zer ez da aldatu azken hamabost urtean? HITZA bai. Papereko egunkarira edo astekarira hertsi bizi eta horretan lan egin izatetik, Internetek iraultza ekarri du. Zer, nola eta noiz komunikatu aldatu da. Webgunea da egun HITZA-ren egunkaria, hor egosten dira eguneroko gorabeherak; astekari honekin saiatzen gara dena soseguz lantzen, lasai irakurtzeko. Baina beti, bidean lagunak izan ditugu: harpidedunak, publizitatea jartzen duten enpresa eta komertzioak, erakundeak… Haiei eskerrak ari zara oraintxe hau irakurtzen. HITZA-k beste 1.000 egin ditzan, askoz gehiagoren bultzada behar du, ordea. Asko egin dugu; asko gara. Gehiago egiteko, gehiago izan behar gara.
