Laffort enpresan grebara deitu du ELAk
Hilaren 18tik 22ra deitu du grebara sindikatuak negoziazioaren blokeoa salatu eta hitzarmen propioa eskatzeko.
Laffort enpresako langileek greba egingo dute datorren astean, hitzarmen propioaren alde. Grebara deitu du ELA sindikatuak Laffort enpresan datorren asterako. Zehazki, hilaren 18tik (astelehena) 22ra (ostirala) deitu du protestara sindikatu horrek hitzarmen propioa eskatzeko eta negoziazioaren blokeoa salatzeko. Sindikatuaren arabera, 37 langileek salatu dute negoziazioaren blokeoa, eta Gipuzkoako errealitateari egokitutako lan baldintzak eskatu dituzte.
Jarrera “pasiboa” egotzi diote enpresari. Langileek salatu dute hiru hilabete baino gehiago joan badira ere, enpresarekin hiru bilera baino ez dituztela egin, eta ez dela benetako aurrerapenik izan. ELA sindikatuaren arabera, aldeak “oso urrun daude” eta enpresak ez duela negoziatzeko “benetako borondaterik”.
Laffort lantegian alkoholdun edarientzako aromak ekoizten dituzte eta 37 langile ari dira lanean; ELAk osatzen du ordezkaritza sindikala hiru delegaturekin. Sindikatu horrek azaldu duenez, egun Estatuko Lurringintza eta Antzekoen hitzarmena aplikatzen zaie langileei, “plantillaren ustez baina, hitzarmen horrek ez du Gipuzkoako lan errealitatea ezta enpresaren egoera zehatza ere islatzen”. Lafforteko langileek otsaila hasieran egindako batzarretan erabaki zutela lehen aldiz hitzarmen propio baten aldeko negoziarioari ekitea jakinarazi du, bestalde, ELAk, “lan baldintzak nabarmen hobetzeko helburuarekin”.
Grebaren testuinguruan, elkarretaratzea egingo dute langileek ostegunean —hilak 21—, 12:00etan Herriko Plazan euren aldarrikapenak kalera ateratzeko. Ohartarazpena ere egin dute; lan baldintza duinak bermatuko dituen hitzarmen kolektiboa lortu ezean, mobilizatzen jarraituko dute.
