Luizia San Pedron
Azken orduetako euri jasek eragin dute ezbeharra, Frontoiko Zumardia aldapan. Hainbat bizilagun etxetik atera dituzte, eta ostatu emango diete. Morales Oliver eta Zamatete arteko kalea itxi egin da.
Azken orduetako euri jasek luizia eragin zuten bart San Pedroko Frontoiko Zumardia aldapan. Pasaiako Udalak aurrez hesitua zuen eremu hori, ezegonkor baitzegoen. Luiziagatik Morales Oliver kaleko 8. eta 9. zenbakietako eraikinak hustu egin behar izan dira. Udaleko Gizarte Zerbitzuen eta aldundiaren laguntzarekin, ostatu emango diete eraikin horietako bizilagunei, ez baita segurua, momentuz, bertan bizitzea.
Udalak adierazi du ez dela kalte pertsonalik izan, eta kalte materialak zuhaitzetan eta errepidean izan direla. Teo Alberro alkatea bertan izan da goizeko lehen orduan, Hirigintzako teknikariekin batera. Udalak mantentze eta egonkortze lanak hasiko ditu orain, baina horiek bukatzeko ez dute eperik ezarri oraindik, makineria sartzeko eremu zaila baita.
Segurtasuna bermatzeko, Morales Oliver eta Zamatete arteko kalea itxi egin da, eta ezin da bertatik pasa, ezta bertan aparkatu ere.
