Lezoko EAJ: "EH Bildu ez da gai aparkalekuen arazoa konpontzeko"
Aurreko legealdian ezarri ziren neurriak EH Bilduk kritikatu zituela esan dute jeltzaleek, baina ez dituztela atzera bota.
Alaitz de La Maza eta Laura Martinez Lezoko EAJko zinegotziak. Lezoko EAJk, EH Bilduren udal gobernuari egotzi dio herrian den “aparkatzeko arazoari” eusteko ez dela gai, eta “ezintasuna, ekintzarik eza eta promesak ez betetzea” leporatu dizkio. Aparkalekuena “arazo larria” dela uste du EAJk: “Bizilagunek irtenbide errealak behar dituzte, ez promesa hutsak”.
Hori esateko atzera joan dira herriko jeltzaleak. Oroitarazi dute aurreko agintaldian (udal gobernua EAJk eta PSE-EEk osatua zen) egoiliarrek soilik aparkatu ahal izateko neurriak eta eremuak ezarri zirela, 20:00etatik 08:00etara hain zuzen. Horiek EH Bilduk “gogor kritikatu” zituela esan du EAJk: “Hala ere, behin udal gobernua hartuta, EH Bilduk ez du egoera irauli eta ez ditu eremuak ezabatu, bere hitzen eta ekintzen arteko kontraesan argia erakutsiz”. Egoiliarren guneena aurreko legealdian indarrean sartu zen ekintza plan baten zati zela azaldu dute jeltzaleek, “EH Bilduk gogor egin zuen horren kontra”.
Aurreko agintaldian kritikatutako neurriak ez aldatzeaz gain, EAJk adierazi du bilkideek ez dituztela eurek landutako proposamenak abiarazi. “2022an aurkeztu zituen proposamenak ez ditu gauzatu, hala nola Lopene parean aparkaleku bat eraikitzea, edo hainbat kale norabide bakarreko bihurtzea, plaza berriak sortzeko. Oposiziotik egindako promesa hutsak dira. EH Bilduk bere konpromisoak bete gabe jarraitzen du”.
Horregatik, udal gobernuari bere eredua arkez dezala eskatu diote, “arazo hau behingoz konpontzen hasteko lehen mailako arazoa da aparkalekuena, eta politikatik lehentasunez heldu behar diogu”.
