Etorri berri direnentzat Harrera Protokoloa eta Plana ditu Lezok
Plana egikaritzeko hainbat hilabeteko lanketa egin du udalak herriko hezkuntza komunitateko kideekin eta herriko eragileekin.
Lezoko Udalak herrira etorri berri direnentzat Harrera Protokoloa eta Plana egin ditu. 2026-2029 epealdirako dokumentua da, eta horiek egikaritzeko hainbat hilabeteko lanketa egin dela zehaztu du udal erakundeak. Aztiker ikergunearen laguntzarekin osatu dira protokoloa eta plana. “Prozesuaren oinarria izan da gaur egun Lezon etorri berriei egiten diegun harrera ulertzea izan da, eta etorkizunean harrera lanean ariko diren eragile guztien artean oinarri eta irizpide partekatuak ezartzeko helburua izan du”. Plana osatzeko prozesuan Lezoko Udaleko hainbat sailetako ordezkariek, hezkuntza komunitateak, eta hainbat gizarte eragilek parte hartu dute. Datozen egunetan aurkeztuko du plana publikoki udalak.
Hausnarketa prozesu baten emaitza izan da Harrera Plana, harrera ereduaren gainekoa. Ikuspegi integral eta komunitarioa izan du ardatz. Udalak zehaztu du aurretik hainbat lanketa egin izan direla herrian, batik bat hezkuntza komunitateen barrukoak. “Hain zuen, Hezkuntza Foroan azaldu zuten eragileek gaia herri mailan modu koordinatuan lantzeko beharra”, azaldu du udalak.
Planaren zehaztasunetan sartuta, horren helburuen berri eman du udalak: “Lezon diharduten eragile instituzional eta sozialen esku-hartzea ordenatzea, herrira datozen pertsona iritsi berriei harrera integrala, gizatiarra, duina eta enpatikoa egiteko”. Horretarako, diagnosia egin eta datozen urteetarako lan-ildo eta ekintza nagusiak zehaztu dituzte prozesuan parte hartu duten erakunde eta eragileek.
