Euskadiko Jokoak eta Oiartzungo MTB Sari Nagusia, hileko azken asteburuan
OTXE klubak antolatuta, hitzordu bikoitza izango da Oiartzunen hilaren 30 eta 31n. Asteburu horretan Urkabe mendira bertaratzeko deia luzatu dute.
Hilaren 30 eta 31n txirrindularitza izango da nagusi Oiartzunen, OTXE klubak bi jardunaldi antolatu baititu: Euskadiko Jokoak eta Oiartzungo MTB Sari Nagusia – Euskal Kopa.
Zehatzagoak izate aldera: asteburu horretako ekitaldiek Cross Country modalitateko bi hitzordu izango ditu. Lehenengoan, larunbatean izango dena, eskola kiroleko gaztetxoek izango dute protagonismoa Euskadiko Jokoetan. Igandean, haatik, Euskal Koparako puntuagarria izango den Oiartzungo MTB Sari Nagusia jokatuko da Gipuzkoako Txapelketarekin batera.
Larunbateko jardunaldian alebin eta infantil kategoriako gazteek hartuko dute parte parte, eta, igandean, berriz, maila guztietako txirrindulariak lehiatuko dira; hala nola, kadeteak, juniorrak, Sub23, elite, master 30, master 40 eta 50 zein emakumezko kategoria guztietakoak. Hori horrela, antolakuntzak aurreikusi du 250 parte hartzaile baino gehiago elkartuko direla asteburu horretan.
Lehiaketak Urkabe mendian jokatuko dira, MTB probarako egokitutako “zirkuitu tekniko eta ikusgarriekin”. Lau kilometro eta bi kilometroko ibilbideak izango dira, eta irteera zein helmuga Urkabe Bidean izango dira.
Horretaz gain, antolatzaileek jakinarazi dute asteburuan zehar kantina zerbitzua egongo dela bertaratzen diren guztientzat, eta, halaber, OTXEk atera dituen elastikoak zein Urkabeko bisera berriak erosteko aukera ere egongo dela aurreratu dute.
Egitaraua
Hilak 30, larunbata – Euskadiko Jokoak (Infantilak)
- 09:00 – 09:45. Izen emateen baieztapena eta dortsalen banaketa
- 10:15. Mutilek lasterketa
- 11:15. Nesken lasterketa
- 12:30. Sari banaketa
Hilak 31, igandea – Oiartzungo MTB Sari Nagusia – Euskal Kopa
- 08:30. Izen emateak
- 10:00. Kadeteak – emakumezkoen kategoria guztiak – master 40 eta 50
- 11:30. Sari banaketa
- 12:00. Juniorrak – master 30 – sub 23 – elite
- 13:45. Sari banaketa
