Iritsi berriei harrera egiteko plan komunitarioa aurkeztu du Lezok
Lezoko Udalaren Harrera Protokoloa eta Plana aurkeztu dituzte gaur. Komunitatean sortua, herri gizatiar, duin eta enpatikoa egiteko tresna da.
Aztikerreko Susana Martinez, Mikel Arruti alkatea, eta Dami Muñoz udaleko Gizarte Zerbitzuetako arduraduna, gaurko aurkezpenean.Lezoko Udala Lezoren biztanleria hazkundea %3,9koa izan da azken urteetan: 2.000. urtean 5.799 biztanle izatetik 2.024. urtean 6.025 izatera igaro ziren. Datuok gaur eman ditu Dami Muñoz Lezoko Udaleko Gizarte Zerbitzuetako arduradunak, Lezoko Udalaren Harrera Protokoloa eta Plana aurkezteko agerraldian. Muñozek azaldu duenez, hazkunde horren arrazoi nagusiak migrazio saldo positiboa eta bizi-itxaropenaren luzapena izan dira. Hala, protokoloa eta plana orain arte udal zerbitzuek egindako lana ordenatu eta baliatzeko tresna ez ezik, “gaia komunitatean bistaratzeko eta lantzeko bidea irekitzeko” aukera izan dela azaldu du. Plana osatzea “premiazkoa” zen Muñozen arabera.
Muñozekin batera Mikel Arruti alkatea eta Aztikerreko teknikari Susana Martinez izan dira agerraldian. Bertan izatekoa zen Wahiba El Houb lezoarra, baina ezin izan duenez, bideo bidez egin du ekarpena. Martinezek zehaztu du planak helburu garbia duela: Lezon diharduten eragile instituzional eta sozialen esku-hartzea ordenatzea, herrira datozen pertsona iritsi berriei harrera integrala, gizatiarra, duina eta enpatikoa egiteko. Lezoko Harrera Protokoloa eta Plana (2026-2029) egikaritzeko bidea duela ia urtebete hasi zen. Prozesuan zehar udaleko sail desberdinek, herriko elkarteek, hezkuntza komunitateak, Osakidetzak eta Lezora etorri diren herritarrek hartu dute parte. Prozesu osoan zehar, Aztiker Ikerguneak izan du gidaritza teknikoa. Udalaren, elkarteen, hezkuntza komunitatearen, Osakidetzaren eta Lezoko bestelako eragileen ardurapean geldituko da planean jasotakoak egikaritzea, betiere udaleko Gizarte Zerbitzuen koordinaziopean. Komunitatean egingo zaie harrera iritsi berriei.
Harrera Plana herriko harrera ereduaren inguruan egindako hausnarketa prozesu baten emaitza izan dela azaldu du Martinezek, ikuspegi integral eta komunitarioa duena. “Iritsi berri den pertsona batek, heltzean, lehen hartu-eman informalen bidez (ezagunen edo komunitateko kideen bitartez izango dituen horien bidez) edota administrazioko egituran egiten direnen bidez Harrera Zerbitzuaren berri jasotzea eta hitzordua ematea da lehen pausua. Lehen hitzordu horretan, intereseko informazio jaso eta oinarrizko kudeaketak egingo ditu, baina urtean behin edo bitan harrera saioak edo bestelako ekimenak egitea jasotzen du planak. Azkenik, arlo sozial eta komunitarioan ere harremanak sortu eta sentsibilizazio zein formazioari begirako lanketak egitea ere beharrezkoa da”. Horretarako hainbat ildo jasota ditu planak. Hala, planaren hartzaile Lezora bizitzera etorri berri den oro dela esan du Aztikerreko teknikariak, “eta fokua bereziki jartzen du gure sistema ezezagun zaien pertsona migrante horiengan. Lehentasunezko begirada jarriko zaie seme-alabekin iristen diren familiei”.
Arrutiren arabera, plana herri proiektua da. “Herri batek harrera ona egiteko, borondate sozial eta politikoa, baliabideak eta antolaketa behar dira”. Lezo herri abegikorra izateko, herrira iristen diren pertsona guztiek informazioa, orientazioa, laguntza eta gertutasuna behar dituztela adierazi du, “hau da, Lezon lehenengo momentutik ongi etorriak eta herriaren parte sentitu behar dira”.
El Houbek lurrera ekarri du planaren mamia. Esperientzia pertsonalera. Prozesuaren parte-hartzailea izan da gainera, eta bere iritzia azaldu du: “Hona iritsi nintzenean galduta egon nintzen, benetan galduta, galdera asko nituelako, kultura berri bat zelako, desberdinak diren gauza askorekin egin genuen topo. Planari esker, gaur egun atzerritarrentzat oso garrantzitsua den ate bat daukagu, bakarrik sentitzen den jendeari laguntzeko ate bat”. Iritsi berri den pertsona batek zalantza asko dituela esan du, baita oinarrizko jarduerekin ere: haurren eskolako matrikulazioak, herrian egiten diren ekintzak… eta komunitatearen parte izateko eguneroko harremanak hastearen garrantzia azpimarratu du: “Orain, entzungo gaituen norbait dagoela sentitzen dut, lagunduko digun norbait”.
