Euskal dantzan trebatzeko aukera Oarsoaldeko euskaltegietan
Mintzagun egitasmoaren baitan, euskal dantzen oinarrizko pausoak ikasteko aukera izango dute Oarsoaldeko euskaltegietako ikasleek datozen egunotan, Axuri Beltza kultur elkarteko kideekin.
2025eko Dantzari Eguneko irudi bat. Mintzagun egitasmoaren baitan, euskal dantzen oinarrizko pausoak ikasteko aukera izango dute Oarsoaldeko euskaltegietako ikasleek datozen egunotan. Tailerrak Axuri Beltza kultur elkarteko kideek eskainiko dituzte. Lehen saioa atzo izan zen, Pasaiako Udal Euskaltegian, eta ekainaren 4ra bitartean eskualdeko beste lau euskaltegitan izango dira Axuri Beltzeko kideak.
Parte hartzaileak euskal dantzaren lehen urratsak modu praktiko eta hurbilean lantzen ari dira. Oarsoaldea Garapen Agentziaren arabera, helburua ez da soilik dantza pauso batzuk ikastea, baizik eta “euskarazko bizipenak sustatzea eta ikasleek hizkuntza eguneroko eta kultur testuinguruetan erabiltzea”.
Mintzagun programa Oarsoaldeko Euskara Batzordeak antolatzen du, eta ikasturtean zehar hainbat gairen inguruko tailerrak egiten dituzte eskualdeko euskaltegietan. Saioek ordu eta erdiko iraupena dute, eta gai erakargarri eta gaurkotasunekoak euskaraz lantzen dituzte.
Tailerren egutegia
- Hilak 28: Errenteria-Oreretako Xenpelar AEKn, 17:30etik 19:00etara.
- Ekainak 2: Antxoko Txirrita AEKn, 10:00etatik 11:30era.
- Ekainak 3: Oiartzungo Intxixu AEKn, 10:00etatik 11:30era.
- Ekainak 4: Errenteriako Udal Euskaltegian, 10:00etatik 11:30era.
