Irtenbide bakarra: Topoa lurperatzea
Agerralda egin dute gaur eguerdian Errenteria-Oreretako auzo elkarteek Topoaren lurperatzea eskatzeko.
Topoa lurperatzea eskatu dute auzo elkarteek. Agerraldia egin dute gaur eguerdian Errenteria-Oreretako auzo elkarteek Topoaren lurperatzea eskatzeko. Argi esan dute, ez dute beste aterabiderik ikusten herria zatitzen eta bizilagun asko-askorentzat zarata arazo larri bilakatu duen trenbidearen auzia konpontzeko. “Hala erabaki du auzo batzarrak baita udal plenoak ere aho batez 2015ean, 2016an eta 2021ean ere. Hori horrela, Eusko Jaurlaritza eta azpiegitura kudeatzen duen Euskal Trenbide Sareari ETS Topoa lurperatzearen alde egin dezatela”.
Sinistuta azaldu dira auzo batzarreko kideak zein agerraldira bildu den herritar andana ere, lurperatuta, Topoak egun eragiten ditun segurtasun, zarata eta bibrazioekin dauden arazoak desagertuko direla, “eta eragiten duen hirigintza gatazka ere konponduko luke”.
Lurperatzearen exigentzia egin dute agerraldia, eta horrekin mezu bat zabaldu, argia: “Ez gara bigarren mailako herritarrak”. Kezka azaldu dute eta haserrea horren harira, hobekuntza ugari egiten ari direla esan dutelako trenbide sarean, “eta Errenteria-Irun trenbide lerroak, Errenteria-Oreretan egiten duen bidean inbertsioak eskatzen ditu sarearen beste puntu batzuetan egin diren bezala”.
Zazpi punturekin arrazoitu dute gaurko agerraldian enegarrenez eskatu duten Topoaren lurperatzea. 1912ko abenduaren 5eaninauguratu zuten Donostia eta Irun arteko Topoaren trenbidea, eta ondoren egindako hirigintza garapenak egungo gatazka eragin duela azaldu dute, “etxebizitzak trenbidetik gertu daude, eta horrek kalteak eragiten dizkie bizilagunei”. Arazo horien artean, zarata, bibrazioak eta segurtasun falta aipatu dituzte, eta argigarriak diren datuak gehitu: eremu batzuetan 70-75 dezibeliotakoa da zarata, eta beste batzuetan 55-60 dezibelio artekoa. Horrek Errenteria-Orereta kaltetuenetako herri bilakatzen duela azaldu dute, “ez dugu guk esaten, hala dago aitortua 2024-2029 Eusko Jaurlaritzaren titulartasuneko trenbide lineen zarataren aurkako ekintza planean”.
Urriaren 19ko 1367/2007 Errege Dekretuari ere aipamena egin diote: “Horrek egunez 65 dezibeliora eta gauez 55era mugatzen du, eta soinu kalitate gisa helburutzat 40 dezibelio ezartzen ditu egunez, eta 30 gauez bizitegi eremuetan, eta 45 egunez eta 35 gauez, gainontzekoetan”.
Trenbidearen bikoizketa ere izan dute hizpide agerraldian. Izan ere ETSk Donostia eta Irun arteko trenbide osoaren bikoizketa iragarri zuen prentsan: “Horrek norabide bakoitzean trenak pasatzea ekarriko luke 7 minutuero; bi norabideak batuta, egunean, 275 eta 300 tren artean pasatzea suposatuko luke, eragindako kalteak ugarituz”. Galtzaraborda eta Erdialde arteko bikoizketa ezinezkoa dela azaldu dute, “espazio faltarengatik”.
Hori horrela, berriro esan dute, irtenbide bakarra Topoa lurperatzea dela, eta gainera, berehala nahi dutela.
Topoa lurperatzea eskatzen duten banderolak zabaldu dituzte, bestalde, auzo elkarteek euren aldarriari ikusgarritasuna emateko. Horiek eskuratzeko, auzo elkarteetara jo behar da; bost euroan dituzte salgai.
