Sagardoak zipriztindu ditu
Intxixu jatetxeko Gurutze eta Koldo izan dira aurtengo omenduak, herriari egindako ekarpenarengatik.
Ohorezko txotxa egiteko unea. Sagardoa probatzeko irrikaz hurbildu dira plazara oiartzuarrak. 18:00etan aurreikusia zegoen hasiera, eta gutxi atzeratuta hasi dute sagardoari emandako eguna. Urtero aitortza egiten diote norbanako, eragile, edota bikote batek, hala gogorarazi du hasiera ekitaldian Aitziber Arnaizek antolatzaileen izenean. berehala argitu du sekretua izan dena arratsaldeko txotx handira arte: Intxixu jatetxeko Gurutze eta Koldo.
Lapiko artean bizitza osoa darama bikoteak, baita herrigintzari eta herriari ekarpena egiten, Arnaizek nabarmendu moduan, “beti laguntzeko prest, zozketetarako sariak emateko prest”. Prestutasuna aitortu diete gaur, Gurutze eta Koldori. Gurutze baino ez da igo oholtzara eta hunkituta jaso ditu esker on hitzak, baita antolakuntzak jarri dion txapela ere. Koldo ez da oholtzara igo, baina sagardozaleen artean nahastuta zegoela jantzi diote txapela ari ere. Hunkituta, malkoak ere bota ditu aitortzarengatik. beti prest laguntzeko, eta aurrerantzean ere hala izango direla ziurtatu du Gurutzek, “herriarentzat beti prest”.
Olarri dantza taldeko dantzariek eta txistulariek Agurra dantzatu diete ondoren, eta gurutzek egin du ohorezko aurtengo txotx handia.
Hortik aurrera, sagardoa erruz eta giro jatorra 20:00ak arte gutxienez, ordura arte izango dira sagardoa zerbitzatzen plazan jarritako postuetan. Hortik aurrera ere, seguru, ez da festarako girorik eta gogorik faltako.
