Paleolitoa eta Aizpitarte, liburu batera
Paleolito Garaiko labar artea Aizpitarte muinoan liburua aurkeztuko dute hilaren 3an, asteazkena, 19:00-20:30 bitartean, Reina aretoan-
Aizpitarte haitzuloetara bisita. Argazkia: Mendi Urruzuno Paleolito Garaiko labar artea Aizpitarte muinoan liburua aurkeztuko dute hilaren 3an, asteazkena, 19:00-20:30 bitartean, Reina aretoan (Xenpelar kalea, 3), Ondarea Orain foru-jardunaldien baitan. Hizlariak Aizpitarte talteko kide den Ainara Rodríguez eta Cantabriako unibertsitateko irakasle den Diego Garate izango dira.
Foru jardunaldi hori, ondarea orainetik begiratzeko gonbidapena da, ondarea jasotako ondare gisa ez ezik, bertan bizi den gizartearekin eraldatzen den eraikuntza bizi gisa ere aitortuz. Kultura, teknologia eta ingurumen aldaketen testuinguruan, programa horrek ondare ngurunearekin harremanak izateko modu berriak bultzatzen ditu, herritarren parte hartzea eta berrikuntza sustatuz.
Programa hemen ikus daiteke: Ondarea Orain 2026
Aizpitarte eta Landarbasoko leizeak
Zalantzarik gabe, Errenteria-Oreretako Aizpitarte edo Landarbaso leizeetan (Aiako Harriko Parke Naturalean eta Kontserbazio Bereziko Eremuan kokatuak -Natura 2000 Sarea-) eta bertako ingurune naturalean aurki daitezke, leku gutxitan bezala, historiaurre urruneko agertokiak irudikatzeko osagaiak. 2013tik, bestalde, bektore interesgarri berri bat gehitu da Aizpitarteko haitzuloen balorazio arkeologikoan eta ekologikoan. Urte horretan historiaurreko artea Aizpitarten agertu, eta, gainera, irmotasunez egin du, lurraldearen ikuspegi orokorra ere nahasi duena, Ekaingo eta Altxerriko santutegi prehistoriko ezagunei lehen mailako kokagunea gehituz.
2013an Aizpitarte IV haitzuloaren sarreran agertutako lehen puntu gorri hark Aizpitarte III haitzuloko pintura eta grabatuen bilduma bati bide eman zion 2015ean, bisonteen eta zaldien irudiak eta Aizpitarte IX haitzuloko beste irudikapen batzuk nabarmenduz. Eta, handik gutxira, 2017an, galeria nagusiaren zorutik 15 metrora zegoen tximinia baten bukaeran, herriko espeleologo ausarten miaketek irudi multzo aparta aurkitu zuten; salbuespenezkoa tamaina, kontserbazio-egoera eta euskarri aldetik. Animalien grabatuak eta hormako buztin berarekin modelatutako baxuerliebeak dituzten bi esparru txiki dira. Horma horietan bisonte batzuk, zaldi bat, elur-orein bat eta bi bulba daude.
