Haurtzaro Eguna ospatzeko, bi eguneko programazioa
Hilaren 6an Haurtzaro Ikastolako Dantza Taldearen emanaldia izango da. Iganderako, berriz, egun osoko egitaraua antolatu dute.
Ikasturte amaiera heltzear da, eta komunitatea sendotu eta urtean zehar egindakoei ginga jartzeko Haurtzaro Eguna egingo dute Oiartzunen hilaren 6an (larunbata) zein 7an (igandea).
Bada, bi urtean behin bi urteko egitaraua antolatzen dute Haurtzaro Ikastolan, eta aurten hala egokitu da, lehenengo egunean Haurtzaro Ikastolako Dantza Taldearen emanaldia izango baita.
Paki Zabala Oiartzabal Haurtzaro Ikastolako idazkari laguntzailea da, eta ospakizun horrek duen garrantzia nabarmendu nahi izan du: “Ikastolako komunitate guztiari luzatzen zaion gonbidapena da, bai gazte, haur zein helduei. Denek parte hartzeko programa prestatzen da”.
Zabalak kontatu du jakitun dela egitarauaren zati handi bat gazteei begirakoa dela, baina, besteak beste, bazkaria eta ekitaldi ofiziala ere egingo dituztela oroitarazi du: “Denentzako izaten den festa bat da, eta ikasleek euren emanaldiak egiten dituztenean gurasoak eta familietako kideak ikustera joaten dira. Denek hartzen dute parte egun horretan”.
“Ikastola denena da”
Egitarauari erreparatuta, Zabalak dio ikastola eguna herritarrak direnentzat zein ez direnentzat dela; “ikastola denena da. Gure komunitatean elkarlan bat eta elkarbizitza bat dago, eta elkarrekin gozatzeko egun bat izan dadin bultzatzen dugu”.
Komunitatean egindako lana izan du hizpide Zabalak, eta, hain justu, horren adibide da taberna zerbitzua. DBHko hirugarren mailako guraso zein ikasleek taberna deitzen dioten zerbitzu bat antolatzen dute jendeak kontsumitu dezan, “finantzaketarako egiten dute”, gehitu du.
Zabala pozik dago astebururako antolatu duten egitarauarekin; “ezingo nuke ezer kendu. Bertsolariek egiten dute sarrera, ekitaldi ofiziala ere badugu, ikasleei ona ematen zaizkie… Programan dugun guztia da interesgarria; dena gustatzen zaigu ikastola egunetik”, amaitu du.
Haurtzaro Ikastola Eguna
Hilak 6, larunbata
- 18:00. Haurtzaro Ikastolako Dantza Taldearen emanaldia Elorsoro kiroldegian.
Hilak 7, igandea
- 08:00. Ginkana ikasleentzat. LH3tik gora.
- 11:15. Eskolaz kanpoko ekintzen emanaldiak:
- Bertsolariak, trikitilariak eta pandero jotzaileak.
- Gimnasia erritmikoko emanaldia. HH5 eta LH 1-2.
- 12:00. Ekitaldi ofiziala.
- Lehendakariaren agurra.
- Xanistebanetako txosna batzordeari esker ona.
- Eskuttun taldeari esker ona.
- Talde Berdeari esker ona.
- DBH 4. mailako ikasleei agurra.
- DBH 4. mailako ikasleen agurra ikastolari.
- Euskal dantzako dantzariak. HH 5 eta LH 1-2.
- 13:30. Haurren bazkaria ikastolako pilotalekuan.
- 14:00. Helduen bazkaria ikastolako pilotalekuan.
- DBH 3. mailako saskien zozketak eta bingoa.
- 14:30etik aurrera. Gaztelu puzgarriak eta haurrentzako tailerrak.
- 15:00 – 17:00. Dj saioa ikasleentzat.
- 17:00. Eskolaz kanpoko ekintzetako dantza modernoko emanaldia.
- Jarraian, zumba saio irekia.
- 18:00. Buruhandiak.
- 18:30. Apar festa (toalla, uretako oinetakoak eta jantziak ekarri).
- 19:00. Zezensuzkoa.
