Osteguna izango da Elizalderen herri bazkariko txartelak erosteko azken eguna
Azken hilabeteetan zenbait jarduera egin ditu Elizaldek 50. urteurrenaren harira, baina hilaren 20a izango da egun handia: Komunitatearen Eguna.
Ikasturte hasieratik zenbait jarduera antolatu ditu Elizalde Eskolak haren 50. urteurrena ospatzeko. Dozenaka hitzordu izan dituzte orain arte, baina hilaren 20a ospakizunerako eguna izango dute, Komunitatearen Eguna ospatuko baitute.
Egun seinalatu horretan azken 50 urteetan eskolaren parte izan diren ikasle, ikasle ohi, irakasle, guraso, langile eta herritar oro elkartzea da helburua “elkarrekin bizitakoa gogoratu, komunitate sena indartu eta etorkizuneko Elizalde irudikatzeko”.
Antolakuntzak jakinarazi duenez, egun horretako ekitaldi nagusia herri bazkaria izango da, eta bertaratzeko txartelak erosi behar dira hilaren 11 baino lehen eskolako idazkaritzan, Kabitxon, Kastron, Mirenen edota Tolaitan.
‘Begiak eta begiradak’ argazki lehiaketa
Festa giroaz gain, Elizaldek herritarren sormena eta ikuspegia jarri nahi ditu erdigunean, eta horretarako Begiak eta begiradak argazki lehiaketa antolatu du “herriko txoko, herritarrak zein herriko istorioak irudien bidez jasotzeko”.
Lehiaketa irekia da herritar guztientzat, baina zenbait kategoria sortu dituzte: LH (Txiki-klik!), DBH (Begirada gaztea), Helduak (16+) eta kategoria berezia (Kategoria nostalgikoa).
- LH. Lehen Hezkuntzako haurrei bideratua da, eta ‘Zer da zuretzat garrantzitsua herrian?’ galderari erantzun behar zaio. Saria umeentzako bat bateko kamera bat izango da.
- DBH. Betikoaren begirada berri bat ematea eskatzen da, eta originaltasuna eta jasotzen dituen giroa baloratuko dira. Saria bat bateko kamera bat izango da.
- Helduak. 16 urtetik gorakoek herriaren arima irudikatu beharko dute argazki batean. Argazkigintza dendan erabiltzeko 50 euroko bonua izango da saria.
- Kategoria berezia. Elizaldeko argazki zaharrak bidali behar dira, eta balio emozionala baloratuko da. Argazki irabazlea Elizalde eskolan jarriko dute, eta bi pertsonentzako gosari bonua ere banatuko dute Xabalen.
Parte hartzaileek hilaren 11 arte dute parte hartzeko aukera, eta posta elektronikoz zein liburutegian, kiroldegian, HAZen eta Elizalde eskolan aurkez daitezke lanak. Emaitzarekin batera kategoria, argazkiaren izenburua, izen abizenak eta harremanetarako telefono bat aurkeztu behar dira.
Antolakuntzak jakinarazi du aurkeztutako lanak ez direla itzuliko, eta sari banaketa hilaren 14an izango dela, 12:30ean, Kontzejupean.
Kirol aniztasuna aldarrikatuz
Elizaldek datozen egunetarako jardueren berri emateaz gain, orain arte burututakoen balantze bat egin du, eta horien artean aurkitzen da Eskubaloia plazara egitasmoaren balorazioa.
Hitzordu horren helburua herrian ohikoak ez diren edota presentzia txikiagoa duten kirolei lekua egitea da, eta jarduerak arrakasta izan zuela azpimarratu dute.
Eguna 09:30ean hasi zuten kalejira batekin, eta elkarrekin gosaltzeko aukera izan zuten gero. Eskolako patio nagusian burutu zuten jarduera bost talde dinamikatan banatuta, eta beroketa edota jolasen tartearen ondotik hiru partida jokatu zituzten.
Hona hemen Elizaldek HITZAri helarazi dizkion zenbait irudi:
