'Kalia' defendatzeko, edabe magikoa
Itturrik herriko merkataritza sustatzeko eta inguruko herrietan dauden komertzio handiek Oiartzuni suposatzen dien arriskuez ohartarazteko edabe magiko bat sortu du.
Kalia aurkeztu zuten ostiralean Oiartzunen. Itturri Oiartzungo merkatari elkarteak antolatu zuen hitzordua, eta euren kide den Biok janari dendako kideek Kalia defendatzeko herritarrei indarrak emango dizkien edabe magikoa egin zuten. Kontzejupean egin zuten hitzordua, eta hamarnaka haur elkartu ziren bertan.
“Gaur Kalia aurkeztu dugu. Guretzat Kalia zuek zarete. Oiartzun da Kalia: bertako ekoizleak, dendariak, bizilagunak… Horregatik, oso garrantzitsua da Kalia zaintzea, indartzea, bertan erostea, aukera dugun bakoitzean Kalia sustatzea, bultzatzea eta parte hartzea”, hasi zuten agerraldia.
Antolatzaileek kontatu zutenez, Oiartzun merkataritza gune handiz inguratutako herria da, eta horrek arriskuan jartzen ditu bertako komertzio txikiak. “Hona Kaliaren zaindari nagusiak ekarri ditugu, egunero Kalia bizirik mantentzen dutenak, Iturriko dendariak, alegia. Kaliaren zaindari nagusiak dira, eta zaintza lan horretan mehatxu handi bat sumatu dute. Ez da bat bakarra, alde guztietatik eraso pilo bat datoz: fisikoak, digitalak, on line erasoak… Denok ezagutzen dugu erromatarren erasoa jasan zuen herrixka bat. Erromatarrak erromatar asentamenduz inguratuta bizi ziren, baina edabe magiko bati esker aurrera egitera lortu zuten”.
“Oiartzun ere horrelakoa da”, jarraitu zuten. “Mercadonum, Carrefourix, Amazonus, Alcampus, Mamutae… Asko daude, eta mehatxu artean bizi den herria da Oiartzun. Gaur Itturritik argi esan nahi dugu ez dugula amore emango, ez garela kikilduko. Zaindu dezagun denon artean Kalia. Noski, ezinezkoa da Kalia zaintzea edabe magiko gabe”.
Eta, justuki, hori zen helburua, herritarrei Kalia zaintzeko indarra emango zien edabe magikoa jendaurrean egin eta herritarrei banatzea. Kontzejupearen alde batean zeuden kokatuta Biok janari dendako Pablo Miranda eta Rebeca Leyva, eta haurrak begira zituzten bitartean egin zuten indarra ematen duen saldaren errezeta.
Biok-ekoak lanean hasi, eta bien bitartean Asterix, Hobeliz, Itturix eta Harantxix pertsonaiak aurkeztu zituzten.
