Gabeziak salatu ditu Ezker Anitza-IUk Correoseko bulego berrian
Alderdiak irisgarritasun eta segurtasun gabeziak antzeman dituela esan du, eta horiek ahalik eta azkarren zuzentzea eskatu du.
Pasaiak Correosen posta bulego berria du, eta martxan da jada. Aurrekotik ondo-ondora eraman dute bulegoa, Trintxerpen Sprilurrek egin duen eraikin berrira alegia, Euskadi etorbideko 2. zenbakira.
Irekieran Correosek jakinarazi zuen 160 metro koadrokoa dela bulego berria, eta erabiltzaileen zerbitzurako eremua 42 metro koadrokoa dela. Bertan hiru langile ariko direla zehaztu zuen. Correosen ohiko zerbitzuez gain, Axa aseguru enpresaren gunea ere bertan da, eta zerbitzu berri bat ere balia dezakete pasaitarrek: Citypaq. Paketeen zerbitzua da hura, eta 36 kaxoiko sistema baten bitartez euren paketeak eguneko 24 orduetan kudeatu ahal izango dituzte horien jabe edo arduradunek; bulegoaren kanpoaldean dago zerbitzu hori.
Pasaiako Ezker Anitza-IUk, baina, Trintxerpeko posta bulego berriaren “irisgarritasun gabeziak” salatu ditu. Alderdiak adierazi du sarrerako atea ez dela automatikoki irekitzen mugikortasun urriko pertsonak sartu ahal izateko, eta, gainera, ate horrek pisu handia duela. “Horrek zaildu egiten du adineko pertsonak bulegora modu egokian sartu ahal izatea. Ez du zentzurik posta bulego berriak prestatu ondoren aurreko lokalak zituen irisgarritasun arazoek bere horretan irauteak. Akats horiek lehenbailehen zuzendu beharko lirateke, pertsona guztiek zerbitzu hori erabili ahal izan dezaten”.
Ezker Anitza-IUk, gainera, segurtasun alderdi batzuk ere alde batera utzi direla zehaztu du: “Ikusi dugu suteak itzaltzeko aparatuak atearen atzean daudela irekita dagoenean. Edo eraikinetik ateratzen zara edo sutea itzaltzen duzu, erabat ilogikoa den zerbait”.
Bide horretan, alderdiarentzat “kezkagarria” da zerbitzu publikoak ematen dituen eraikin berri batek “dagoeneko irisgarritasun unibertsaleko eta segurtasuneko arazoak izatea”.
“Portuko lurretan hirigintza kontrolatzeko eskumena Pasaiako Udalaren esku ez badago ere”, Ezker Anitza-IUk udal erakundeari eskatu dio “eraikinaren garapenean egindako akatsak ahalik eta lasterren zuzentzeko beharrezko kudeaketak egitea, Pasaiako herritarren eskubideak defendatzeko helburuarekin”.
