Ongizate integrala, plazan
Joan den asteko ostegun eta ostiralean Ongizatearen Plaza egitasmoaren bilgune izan zen San Pedroko Lonjako plaza.
Joan den asteko ostegun eta ostiralean Ongizatearen Plaza egitasmoaren bilgune izan zen San Pedroko Lonjako plaza. Ongizate integralaren inguruko hainbat solasaldi, mahai-inguru eta jarduera parte hartzaile hartu zituen Foru Aldundiak antolatutako espazio berritzaile honek. Bertan, bi egunetan zehar mintzagai izan ziren longebitatea, berdintasuna, elikadura osasuntsua, pantailak, gazteen ongizatea eta itsasoaren inguruko bizipenak, besteak beste. “Parte-hartze zabala eta elkarrizketa aktiboa sustatu duen heinean, beraz, arrakastaz gauzatu da aldundiaren egitasmo hau, Zarautz, Bergara, Eibar eta Hernanin antolatu ondoren, Pasaiak ostegun eta ostiralean hartu zituena”, esan du aldundiak.
Eider Mendoza diputatu nagusiak eskerrak eman dizkie Ongizatearen Plazan parte hartu zuten denei: “Ikusi eta sentitu dugu zeinen garrantzitsua den, egungo mundu aldakor eta azeleratuan, bizitza-orekan eta ongizatean inpaktua duten arazoez mintzatu eta elkarri entzutea, errealitate zahar eta berriei komunitatean nahiz politika publikoen bidez erantzun ahal izateko. Ahalegin partekatua gauzatzen jarraituko dugu norabide horretan”.
Pasaiako alkateak, Teo Alberrok, adierazi du ongizatea ezin dela ulertu ikuspegi indibidual hutsetik, baizik eta komunitate sendo, zaintzaile eta kohesionatu baten baitan: “Pertsonen bizi-kalitatea ezin da egon soilik baldintza materialei lotuta; harremanek, zaintzek, berdintasunak eta komunitatearen babesak ere eragin zuzena dute gure ongizatean”. Alkatearen hitzetan, Pasaiak badu tradizio berezia auzolanaren, elkartasunaren eta komunitate-sareen inguruan, eta balio horiek gaur egungo erronkei erantzuteko ezinbestekoak dira. “Herri gisa, inor atzean ez uztea izan behar dugu helburu. Ongizatea eskubide kolektibo gisa ulertu behar dugu, eta erakundeok baldintzak sortu behar ditugu pertsona guztiek bizitza duina garatu ahal izan dezaten”, nabarmendu du.
Asotarikoak izan ziren joan den asteko ostegun eta ostiralean Lonjako gunean egindakoak. Adinekoentzat ariketa fisiko saioak, estimulazio kognitibo saioa, solasaldiak, gosari-tailerrak, gazteen ongizateari buruzko jarduerak, elikadura osasungarriari buruzko argibideak, sare sozialen erabilerari buruzko informazioa, Altxa Buruarekin elkarlana eta beste asko izan ziren.
