Itsasora begira da 'Libia'
Larunbatean hasiko da KAE1 Liga, eta San Pedrok atzo aurkeztu zuen lehian izango duen eskifaia, barrutiko lonjan.
Arraun denboraldia gainean da. Larunbat honetan hasiko da KAE1 Liga Astilleron (Kantabria), eta San Pedrok atzo aurkeztu zuen aurtengo udan lehian izango duen eskifaia, barrutiko lonjan. Ehun zale inguru bildu ziren arraunlariei sostengua emateko. Horien artean izan zen Teo Alberro alkatea. Aurkezpenaren bukaeran, familia argazkia atera zuten arraunlariek, harrobiko kirolariek, klubeko kolaboratzaileek eta zaleek.
Patxi Frances Libia-ren entrenatzailea eta Rafa Gonzalez de Txabarri prestatzaile fisikoa “ilusioz” dira sasoia hasteko. Honakoa esan zuen Francesek: “Denboraldi zaila izango da plantillaren gaztetasunagatik, baina horrek gogoa eta ilusioa sorrarazi dizkio taldeari. Momentu zailak izango ditugu, baina kontziente izan behar gara San Pedroren garrantziaz eta Libia-k arraunaren historian duen lekuaz. Dena eman behar dugu, jakinda sufritu beharko dugula”.
Bestalde, honakoa adierazi zuen Alberto Iñurrategi presidenteak: “Klubak konfiantza du prestatzaile eta arraunlariengan, eta motibatuak eta gogotsu ikusten ditugu denboraldia hasteko. Zaleen eta herriaren babesa dugu, eta esperantza dut banderaren bat lortzeko”.
Eskifaiaren izenean, Iñaki Bereau patroiak hartu zuen hitza: “Dena emango dugu ahalik eta denboraldi onena egiteko”.
