Papresaren jabe berriekin bilera egin du udalak
Helburua, lankidetza estu eta erraza abiatzeko oinarriak ezartzea izan dela azaldu du udalak.
Ostegunean egin zuen udalak bilera Papresako jabe berriekin.Herri Bizia Papresa lantegiaren jabe berriekin bilera egin zuen udalak joan den ostegunean. Helburua, lankidetza estu eta erraza abiatzeko oinarriak ezartzea izan dela azaldu du udalak, “herriarentzat onuragarria izango baita hartu eman zintzo eta arina izatea”. Enplegu zein jarduera ekonomiko ikuspegitik harago, Papresa erdigunean dagoen neurrian, herritarren bizitzan zein bizi kalitatean eragina du eta, ondorioz, udalarekin elkarlana beharrezkoa dela esan du tokiko erakundeak.
Hilabeteetako prozesu luze bat eta gero jabez aldatu du Papresa fabrikak, hartzekodunen konkurtsora aterata. Esku aldaketa hau oraindik formalizatu ez bada ere, epailearen ebazpena falta baita, egintzat ematen dute alde guztiek jabe berria CL Grupo Industrial taldea izango dela. Langileen ordezkariekin akordioa lortzea ere garrantzitsua izan da; Papresaren langileen batzordea eta CL Grupo Industrial taldeak adostu dute lanpostuen %80 subrogatzea. Akordioak, halaber, lanaldia asteko 35 ordutik, 37,5 ordura pasatzea, eta datozen bi urtean soldatak izoztuta izatea suposatuko du.
