Uztailean egingo da etxebizitza tasatuen urteko bigarren zozketa
Elizaldeko etxebizitza bat zozkatuko da tasatuen eskatzaileen udal erregistroan izena emana izan, eta horren ezaugarriekin bat egiten dutenen artean.
Elizalde auzoan dago uztailean zozkatuko den etxebizitza. Oiartzungo Udalak jakinarazi du etxebizitza tasatuen urteko bigarren zozketa uztailean egingo dela, Elizalde auzoko etxebizitza bat zozkatuko da: gela bat du, eta bigarren eskukoa da, eta ez du garaje nahiz trastelekurik. Behin-behineko prezioa 137.750 eurokoa da (BEZik gabe). Izan ere, udalaren etxebizitza plan integralaren barrukoa da tasatuen kudeaketa eta salerosketa, eta horien barruan berriak eta bigarren eskukoak daude. Zozketan parte hartzeko ezinbesteko da etxebizitza tasatuen eskatzaileen udal erregistroan izena emanda izatea, hilaren 29a baino lehen. Esteka hau baliatuta, erregistro horretako kide izateko inprimakia lor daiteke. Zozketan, etxebizitzaren ezaugarriekin bat egiten dutenek parte hartuko dute.
Prozedura zehatz bat izango du uztaileko zozketak. Izen emate epea bukatuta, hilaren 30ean zozketarako onartuen behin-behineko zerrenda kaleratuko du udalak bere webgunearen bitartez. Uztailaren 10ean zabalduko da alegazio eta lehentasun aldaketen aroa, eta hil horretako 20rako izango da prest behin betiko zerrenda. Uztailaren 29an egingo da zozketa Landetxen, eta horren emaitzaren nahiz itxarote zerrendaren berri egun horretan bertan emango du udalak haren web orrian.
Joana Mendiburu alkateak jakinarazi du udalaren sei puntuko etxebizitza plan integralaren zati dela etxebizitza tasatu guztien salerosketaren eskumena udalarena izatea: “Gure esku dauden eskumen guztiez baliatzen ari gara desio den etorkizuneko Oiartzun irudikatu eta herritarren beharretara ahal hainbat egokituko den etxebizitza plan integrala izateko”. Tasatuen salerosketa udalaren eskumenekoa izatea, etxebizitza arloko espekulazioari aurre egiteko tresna dela zehaztu du alkateak, “herritar zaurgarrienak babesteko eta etxebizitza bizileku gisa lehenesteko”.
Apirilean egin zen etxebizitza tasatuen lehen zozketa. Horren balorazio baikorra egin du udal agintariak, nabarmenduz ordutik etxebizitza tasatuen eskatzaileen erregistroko izen emateen korua %20 hazi dela. Apirilekoan, 188 familia unitatek parte hartzeko aukera izan zuten. “Horrek adierazten du badagoela beharra eta udala bere esku dagoen guztia egiten ari da gogor lanean eta ahal bezain fin erantzuten”.
