Marea arrosak bultzada eman die arraunlariei
Igandean aurkeztu zituen San Juanek herriaren aurrean ligetan lehian izango diren traineruak. Aitortzarako tarteak ere izan ziren.
Igandeko ekitaldiaren talde argazkia.San Juan Marea arrosaren aurrean jarri ziren San Juango arraunlariak igande eguerdian. Ligetan lehian izango diren traineruetako kirolarien aurkezpena egin zen Santiago plazan. Horrez gain, aitortzarako tartea ere izan zen.
Arraunaren mailarik gorenean ariko dira San Juanen emakumeen eta gizonen traineruak, Euskotren eta Eusko Label ligetan hurrenez hurren. Hilaren 28an hasiko dira puntuen bilketan liga horietako lehen estropadetan, Madrilen. Gizonen helburua da iaz azaldutako mailari eustea, eta emakumeena, Euskotrenera iritsi berri izanik, maila horretan egonkortzea. Helburu horiek lortzearen arduradun izango diren arraunlariak banan-banan aurkeztu zituzten barrutiko plazan.
Horrez gain, harrobiko arraunlariek ere herriaren txalo zaparrada jaso zuten. Izan ere, asko izan dira bai bateletan, trainerilletan zein aulki mugikorrean aurten irabazi dituztenak, eta haiek ere sanjuandarren omenaldia jaso zuten. Klubeko entrenatzaileei ere egin zitzaien oles.
Itzalean lanean ari diren horiek ere jaso zuten aitortza. Klubaren irudi direnak asko dira, ordezkari ezagun asko ditu izan kirolari, entrenatzaile, edo zuzendaritzako kide. Baina egunero-egunero dena zuzen joan dadin jardunean ari dienengatik ez balitz, kirol elkartearen funtzionamendua nekezagoa litzateke. Horregatik, isilpeko lan hori egiteagatik, Agustin Iriarte Txiripi-k, Justo Erimiasek, eta Joakin Arzuaga Txintxo-k San Juanen, eta herritarren aitortza jaso zuten igandean.
Jarraian, aurkezpeneko hainbat irudi, San Juanek HITZAra bidalitakoak.
