Uztailaren 4an izango da Poesia Eguna
11:00etan hasita, poesia izango da nagusi Oiartzunen. Gainera, poemak azalean eramateko aukera izango da, tatuaje saio bat antolatu baitute.
Metrokoadrokak, 1545 argitaletxeak eta Hitzen Lihoak Oiartzungo Udalaren laguntzarekin antolatzen dute Poesia Eguna, eta dagoeneko aurtengo hitzorduaren egitaraua argitaratu dute. Uztailaren 4an (larunbata) izango da egun seinalatua, eta egun osoko egitaraua antolatu dute herritarrek poesiaz goza dezaten.
Bada, ohiko ibilbide poetikoa, errezitaldi poetiko musikatua edota kontzertua izango dira egun horretan, herriko zenbait gunetan. Hala ere, aurtengoan Poetattoo jarduera berritzailea gehitu dute programazioan; tarte horretan zuzenean tatuatzeko aukera izango dute hala nahi dutenek, baina soilik euskaraz diren poema zatiak tatuatzeko aukera izango da.
Le Titarek tatuatuko ditu esaldiak, eta izena eman behar da horretarako hilaren 19a baino lehen helbide elektroniko honetara idatzita. Mezu horretan norberak azalean islatu nahi duen poema zatia txertatu behar da, bai eta gorputzeko zatia ere. Bi orduko epe horretan tatuatzeko eskaera asko jasotzen baldin badituzte, zozketa egingo dutela aurreratu dute. Saioa Arizmendieneko errezitaldian izango da, 18:30etik 20:30era bitartean.
Oiartzungo Poesia Eguna
- 11:00. Ibilbide poetikoa Ugaldetxon barrena, Iurritako errota parean hasita.
- Herriko poeta eta irakurleak eta Arantzazu Lizartza, Ione Gorostarzu, Peio Iturralde eta Rakel Pardo.
- 17:00. Poesian oinarritutako kultur egitasmoak: Badago sarerik? mahai ingurua udaletxeko areto nagusian.
- Hernaniko Kale Literatura, Hatsa elkartea, Azpimarra, Balea Zuria, Lekeitioko Irailekoak poestia jaialdia.
- 18:30. Errezitaldi poetiko musikatua Arizmendieneko loratgian.
- Oihana Arana, Leire Bilbao, Itxaro Borda, Jon Garmendia Txuriya. Xabi Belaunzaran, Julen Etxebeste eta Oihan Gastesik musikaz lagunduta.
- 18:30 – 20:30. Le Titareren eskutik, zuzeneko tatuaje saioa: Poetattoo. Arizmendieneko lorategian.
- 21:00. MICEren kontzertua Arizmendieneko lorategian.
