Lehiarako prest da Hibaika
EMKE Banda izango du aurtengo denboraldiko amabitxi Hibaikak. Helburua, Euskotren eta KAE1 Ligan mantentzea.
Hibaikako arraunlari seniorrak Hibaikak gaur arratsaldean aurkeztu ditu uretan izango dituen bi traineruak, eta horiek gobernatu eta emaitza ahalik eta onenak lortzeko ardura izango duten arraunlariak. Iztieta auzoko Diputazio plaza aukeratu du herriko agendan urteroko hitzordu garrantzitsu bilakatu den aurkezpen ekitaldia egiteko. Ez du ausaz hartu erabakia, izan ere, auzo horretan jaio zen arraun proiektua, eta bertan hezi eta hazi.
Euskotren Ligan ariko da Emakumeen trainerua, arraunaren gorenean beste urtebetez. Hemezortzi kirolarik—hamasei arraunlari eta bi patroi— osatutako eskifaia gora begira jarriko da hilaren 28an hasiko den ligan. Hala adierazi du entrenatzaile duten Iñaki Mendizabalek. Talde gaztea dela aurtengoa, bataz bestekoa 21 urtekoa dute, eta arraunlari horietatik hamalau harrobikoak dira, Hibaikan zailduak arraun munduan, “beste talde batzuekin alderatuta, Hibaikak azken urte hauetan lan handia egin duen taldea da eta harrobiari begira aritu da, garrantzia emanez”.
Talde gaztea, baina esperientzia handikoa, hala esan du Mendizabalek, “estropadetan aurpegia emango dugu, gogor jokatuko dugu ahalik eta emaitzarik onena lortzeko. Helburua gorantz, ia denboraldian bigarren txanda horretan sartzea dugun, beti ere, hankak lurrean edukita baina gure lana eginda”. Hilaren 28an hasiko dute liga eta data horri begira jarri da prestatzailea, “ea emaitza ona ekartzen dugun Madrildik”.
Gizonen ontzia KAE1 Ligan lehiatuko da, iaz igoera erdietsita. Haien izenean Ander Rekondok hartu du hitza. Aurten plantilla zabala dutela, baita “oso txukuna ere” jarri du nabarmen Hibaikako gizonen traineruko patroiak: “Urte osoa daramagu entrenatzen gogotsu. Neguan entrenamendu gogorrak izan ditugu itsasoa eta eguraldiagatik, baina burua hotz mantendu dugu eta urtean zehar egindako arraun testak txukun atera zaizkigu”.
Aurtengo denboraldiari begira jarri da ondoren. Argi azaldu du traineruaren helburua, “maila mantentzea. Iaz igo ginen eta uste dut borroka txukuna egingo dugula KAE1en mantentzeko. Asteburuan hasiko dugu liga Astilleron eta espero dut hemen zaudeten guztiak ikustea igandean taldea animatzen gure helburua lortzeko”.
Bi ontzietako arraunlariak eta horien prestatzaileak gaurko protagonista handiak, baina baita harrobia ere. Izan ere, ezinbestekoa da harrobia kluben etorkizunerako. Behe kategorietan ari diren guztiei beraz, aitortza gaurko aurkezpen ekitaldian, lan bikaina egin baitute batel zein trainerilla denboraldietan ere.
Musika banda amabitxi
Berezia izan da gaurko aurkezpena. Plazan jarritako aulki guztiak beteta, musikak hasi du ekitaldia. Urtero eragile bat omentzen du Hibaika Arraun Elkarteak, eta aurten EMKE Banda aukeratu du herriari hamarkada luzeetan egin dion ekarpenarengatik. Ekitaldiaren aurkezpen lanetan, gainera, bandako presidente Josu Mitxelena jarri dute. Musika banda izango da aurtengo Hibaikaren bi ontzien ama bitxia; gogotsu hartu du erronka, eta Hibaikak Alain Aierdi Gurpegi zuzendariari eman dio arraun elkartearen oroigarria.
Musika banda protagonista ere, beraz, baina baita Iztieta-Ondartxoko bizilagunak eta Gurekin auzo elkartea. Horiei ere aitortza gaurko ekitaldian, “izan ere beti eskaini baitiote babesa Hibaikari”.
Musikarekin hasi eta musikarekin bukatu dute ekitaldia gaur, EMKE Bandaren doinuekin, eta pintxo dastaketa ere izan dute. Herritarrei eta Hibaikazaleei eskaera, “animatu gure arraunlariak, zuen hauspoa ezinbestekoa baitute iritsi diren lekura iristeko eta bertan mantentzeko”.
Arraunlariak
