Artilearen ekoizpen prozesua ikusgai Agustinak zentroan
'Arditik ardira' proiektua inauguratu dute, eta haren helburuak Latxa ardiaren artilearen prozesua eta artisau lana balioan jartzea dira.
Arditik ardira, artilea ardatz duen sormen, artisautza eta ingurumen proiektua ikusgai jarri dute Agustinak zentroan. Latxa ardiaren artilearen prozesua eta artisau lana balioan jartzeko helburuarekin sortutako egitasmoa da, eta kontatu dutenez, “ikuspegi berritzaile eta garaikide batetik” erakusten dute artilearen ekoizpen prozesu osoa.
Era beran, baina, gaur egun artileak bizi duen erronka ekologikoa azaleratzen duela diote, bai eta “bere balio materiala, kulturala eta sortzailea aldarrikatu” ere “erabilera eta aukera berriak sustatuz”.
Arditik ardira Idoia Lizeaga, Mendi Urruzuno eta Olatz Pujanaren ekimenez sortu da; Lizeaga arte floraleko maistra eta bitxigilea da, Urruzuno argazkilaria eta Pujana, berriz, Arte Ederretan lizentziatu eta kontserbazio eta zaharberritzean espezializatutako profesionala.
Bestalde, azaldu dute proiektuaren helburu nagusietako bat artisautza lanbidea indartzea eta biziberritzea direla. Bide horretan, uztailera arte Agustinak zentroan artilearen ekoizpen prozesua dokumentatzen duen argazki erakusketa egongo da ikusgai.
Erakusketa dagoeneko ikusgai dago, eta instalazioa zentroaren ohiko ordutegietan bisitatu ahal izango da.
