Soldata izozteen kontra, Lezoko udal langileak kalean
Kexu dira langileak udal gobernuak ez diela izoztearen eta horren arrazoien gaineko jakinarazpen ofizialik eman.
EH Bildu langileen kontra, soldata izozterik ez! lelodun pankartaren atzean bildu dira gaur goizean Lezoko Udaleko langileak, udaletxearen parean, hamabost minutuko elkarretaratze isilean. Mobilizazio aroa hasi dute beharginek soldatak izoztu dizkietelako, eta langileek mobilizazioa deitzeko argitaratutako oharrean jasota dagoen bezala “bizitzen ari garen egoera salatzeko”. Kexu dira langileak udal gobernuak ez diela izoztearen eta horren arrazoien gaineko jakinarazpen ofizialik eman; ahozko informazioa bai, baina idatzizko jakinarazpen ofizialik ez. Hala, langileek izozte erabakiaren gaineko azalpen zehatz eta ofizial bila idazkia erregistratu dute udalean, eta gobernu taldearen erantzunaren esperoan dira.
Udalak 2025ean izan zuen diru soberakinaren datuan oinarrituta, langileek azaldu dute izozteak ez duela justifikaziorik. “2025ean udalak bi milioi euroko soberakina izan zuen, baina gobernu taldeak egoera ekonomiko larrian oinarritu du izoztearen beharra”. Gainera, udal agintariak “lege urraketa” bat egiten ari direla uste dute: “Estatuko gobernuak langileentzako aurreikusitako soldata igoerak ez dituzte aplikatuko”.
Soldata izoztearen berri ahozko hartu-eman baten bidez izan zutela adierazi dute langileek. Hortik gutxira, udal gobernuak agerraldia egin zuen, 2025eko irailaren 30ean zehazki, esateko gastuak murriztu eta diru sarrerak handitzeko neurriak hartuko zituela. Hala, langileek salatu dute neurri horien gaineko informazio zehatza hedabideen eta udal aldizkariaren bidez jaso zutela.
