Herri oso bat, harro eta irriz
'Herri, harro, irri' ikuskizuna egin zuten larunbatean Gurutze Santuaren plazan. Emozioz eta lezoarrez bete zen herriguneko zabalgunea.
Gurutze Santuaren plazaren irudi orokorra, larunbat gauekoa. Gogoratzeko gaua izan zen larunbatekoa Lezon. Hala izango zela iragarri zuten Herri, harro, irri ikuskizuna mamitzen izan zirenek, eta hala izan zen. Kultur eztanda goxoa jaso zuen Gurutze Santuaren plazak, eguraldi epelarekin, harrera ezin beroagoarekin. Bete-bete egin zen herriguneko zabalgunea herritik, herrikoekin, eta herriarentzat sortutako ikuskizunarekin. Une hunkigarri asko izan ziren. Txalo zaparradak bata bestearen atzetik, emozioak bor-bor, kultur emaria sekulakoa, eta emaitza gogoratzekoa.
Musikan eta dantzan oinarritutako ikuskizuna izan zen Herri, harro, irri. Baina lezoar sentimendutik egikaritutakoa. Tomas Garbizu Lezoko Udaleko Musika Eskolako ikasleak; Murixka, Zubitxo eta Aitona-Amonen Borda dantza taldeetako kideak; Sutargi abesbatza; Enara Artola dantzaria; Iker Domingo, nahiz Mariana eta Hanna Ponochevna abeslariak; eta txalapartariak izango ziren talentuaren eta emozioaren emaile; jasotzaile, berriz, plaza alderik alde bete zuten lezoarrak. Gau gozoa larunbatekoa Lezon.
Jarraian, antolatzaileek HITZAra bidalitako bideoan, Ilargi berriak, Amona Maria Luisa, eta Palestinaren zauriak abestiekin sortutako piezak ikus daitezke. Ikuskizunaren hainbat argazki beherago.
