Oiartzungo babesgune klimatikoen sarea, martxan
2027ko udaberrian aurkeztuko dute lana, baina orain arte egindakoa azaltzeko eta ekarpenak jasotzeko aurkezpen bilera egingo dute hilaren 29an.
Oiartzungo Udalak beroaldiei aurre egiten laguntzeko babesgune klimatikoen azterketa egin du, eta egindako lana jendaurrean jartzeko zein ekarpenak jasotzeko bilera irekia egingo dute hilaren 29an (astelehena).
Udala hiriguneko babesgune klimatikoak identifikatzen ari da, gero horiekin mapa osatzeko; zehazki, aire zabaleko zein eremu itxietako aterpe klimatikoekin ari da lana osatzen “ahalik eta maparik zabalena egiteko helburuarekin”.
Diotenez, Elizalde, Arragua, Altzibar, Iturriotz eta Ugaldetxo auzoetan du fokua proiektuak, eta herritar zein gune zaurgarrienak jarri nahi izan dituzte erdigunean; alegia, adinekoak, haurrak, arnas gaixotasunak dituztenak edota haurdun dauden emakumeak.
Proiektuaren %80, finantzatuta
Udalak jakinarazi duenez, proiektu horrek Eusko Jaurlaritzaren Industria, Trantsizio Energetiko eta Jasangarritasun Sailaren diru laguntza jaso du, eta hartara, inbertsioaren %80 finantzatuko dute laguntzarekin.
Urtarriletik apirilera bitartean proiektua definitzen eta testuinguruan jartzen aritu dira, bai eta auzoetako mapa termikoak egiten ere. Bestelako zenbait jarduketa ere egin dituzte, eta mapa termikoen emaitza eskuetan zutela, maiatzean, aire libreko zein eremu itxietako babesgune klimatikoen banan-banako eta lekuan lekuko azterketak egin dituzte. Hortik ateratako informazioarekin zerrenda eta mapa bana egin dituzte, eta lehen zein bigarren faseko babesguneak definitu dituzte. Lehenengo fasean 15 babesgune daude, eta bigarrenean, berriz, beste 14 gune.
Hilaren 29an, aurkezpen bilera
Udalak hilabeteak daramatza horretan lanean, eta orain egindako bidea erakutsiko die herritarrei. Horretarako bilera ireki bat antolatu dute hilaren 29rako; 18:00etan izango da Arizmendienean, eta bertan herritarrek ekarpenak jasoko dituzte. Oiartzungo babesgune klimatikoen sarea 2027ko udaberrian aurkeztuko dute.
