Treberaren 'Ziaboga', San Fermin parrokian
Uztailaren 1ean, 20:00etan eta San Fermin parrokian, 'Ziaboga' ikuskizuna jendartera zabalduko dute. Doan da sarrera.
Treberako kideak, Pasaia Itsas Festibalean egin zuten emanaldian.Trebera Aurten ere, iaz bezala, Trebera musika-antzerki taldekoak arduratuko dira Antxoko San Fermin Festen atarikoak girotzeaz. Uztailaren 3an (ostirala) hasiko dira ofizialki Antxoko jaiak, nahiz eta aurretik ere badiren jarduerak. Horietako bat Treberarena da: uztailaren 1ean, 20:00etan eta San Fermin parrokian, Ziaboga ikuskizuna jendartera zabalduko dute. Doan da sarrera.
Ziaboga jada hainbatetan eskaini du Treberak, tartean Pasaia Itsas Festibalean edo Herrerako festetan. Orain etxean jokatzea tokatzen zaie. Hala, udaberri-uda honetan eskaintzen ari diren Ziaboga kontzertu formaturako egokitu duten bertsioa da. Urte bukaeran estreinatuko da obra osotasunean, Donibaneko Juanba Berasategi auditorioan.
“Garai guztietako doinuz osatutako ibilbidea proposatzen dugu Ziaboga-rekin, itsasoaren mundua eta gure portu eta marinel-herria oinarri hartuta. Euskal abesti, barkarola, habanera, zarzuela kanta eta beste musika erritmoek osatzen dute gure errepertorioa”, zehaztu dute taldekideek. Azken ikasturtean jo eta su lantzen izan dira ikuskizuna Antxoko eta inguruko herrietako artistak biltzen dituen kultur taldekoek; gozo ari dira zabaltzen Ziaboga.
