"Elkarlanean eta konpromisoz aurrera egiten jarraitzea ezinbestekoa dugu"
LGTBIQ+ pertsonen Eskubideen Eguna izango da igandean (hilak 28), eta Oiartzungo bi udal taldeek adierazpen instituzionala adostu dute.
Hilaren 28a LGTBIQ+ pertsonen Eskubideen Eguna da, eta Oiartzungo bi udal taldeek adierazpen instituzionala adostu dute. Hori horrela, alde ezberdinetatik datozen eraso LGTBIQ+fobikoen goraka “erabat errefusatu” eta lanean “irmo” jarraitu behar dela adierazi dute EAJ eta EH Bilduko ordezkariek.
Era brean, borrokan eta elkarlanean jarraitzea “ezinbestekoa” dela diote “lorpenetan atzerapausorik ez egoteko eta eskubideetan aurrera egiten jarraitzeko”. Horrela diote: “anekdotikoak diren politikak alde batera utzi, eta estrukturalak diren horiek erdigunean jartzeko garaia da, eta horretan saiatzen ari gara”.
Hona hemen bi udal taldeen adierazpen instituzionala, hitzez hitz:
Ekainak 28: LGBTIQ+ Kolektiboaren Sexu Askapenaren eta Harrotasunaren aldeko Nazioarteko Eguna
Gaurko eguna baliatu nahi dugu gure bizitzez, gure bizi historiaz eta LGBTIQ+ mugimenduaz harro gaudela esateko.
Eraso LGBTIQ+fobikoen datuak gora doaz, armairuak presente jarraitzen du gure bizitzako arlo guztietan, diskurtso patologizatzaileak ugaritzen ari dira, eta ondorioz, gure bizitzak arriskuan daude.
Gorroto-diskurtsoek, komunikabide nagusienen estigmatizazio saiakerek eta manipulazioak zein eskuin muturreko diskurtsoek zis-hetero arautik ateratzen diren bizitzak ezabatu nahi dituzte pertsonen duintasuna, askatasuna eta giza eskubideak zalantzan jarriz.
Hori horrela, garrantzitsua da nondik gatozen ospatzea eta aldarrikatzea eta LGBTIQ+fobiarik gabeko herri baten alde borrokatzen jarraitzea, zeinetan pertsona guztiak askatasunez, duintasunez eta beldurrik gabe bizi ahalko diren.
Kolektiboek eta norbanakoek urteetan zehar egindako lanari esker lorpen handiak egon dira. Orain elkarlanean eta konpromisoz aurrera egiten jarraitzea ezinbestekoa dugu, lorpenetan atzerapausorik ez egoteko eta eskubideetan aurrera egiten jarraitzeko.
Gure kasuan, instituzioetatik politika publiko integral eta sendoak, perspektiba feministan oinarritutako zerbitzuak, babes kolektiborako eta autodefentsarako mekanismoak ezartzeko bideak… lantzea ezinbestekoa dugu. Anekdotikoak diren politikak alde batera utzi, eta estrukturalak diren horiek erdigunean jartzeko garaia da.
Horretan ari gara gobernatzen ari garen hainbat udaletan, eta hori sustatuko dugu oposizioan gauden esparru guztietan ere.
Horren adibide da, Oiartzungo Udalak apirilean LGBTIQ+ pertsona, familia eta eragileentzat arreta, informazio eta aholkularitza zerbitzua eskaini izana, Berdindu Ibiltariaren bidez.
Era berean, dei egiten dugu ekainaren 28aren bueltan antolatu diren ekimen eta mobilizazioetan parte hartzera, eta bukatzeko, LGBTIQ+ pertsonen bizitzak egunerokotasunean bizigarriak izateko lanean eta borrokan ari diren kide eta kolektibo guztiei eskerrak eman nahi dizkiegu, guztiak zoriondu nahi ditugu, harrotzeko moduko mugimendua osatzeko ezinbestekoak direlako.
Gure bizitzek balio dutelako, gora ekainaren 28a!
