Merkataritza eta negozio txikiak sustatzeko diru laguntzekin, aurrera
Negozio txikien sarea sendotzea, herritarrei beharrak auzoan bertan asetzeko aukera ematea eta auzoak biziberritzea dira laguntzen helburuak.
Iaz herrian merkataritza eta negozio proiektu txikiak sustatzeko diru laguntzak jarri zituzten martxan, eta aurtengoan bide horrek jarraipena izango duela jakinarazi du Oiartzungo Udalak. Azaldu dutenez, hiru helburu ditu horrek: herriko merkataritza eta negozio txikien sarea sendotzea, herritarrei eguneroko beharrak auzoetan bertan asetzeko aukera ematea, eta, azkenik, lokal hutsetan proiektu berriak bultzatuz auzoak biziberritzea.
Oiartzungo Udalak 35.000 euroko diru partida du baldintzak betetzen dituzten merkataritza eta negozio proiektu txikiak sustatzeko, eta azpimarratu dute laguntza hori bost urtez jaso daitekeela. Hori proiektu berriek edota azken bost urteetan ireki dutenek jaso ahal izango dute; lehen urtean 4.000 euro arte jaso daitezke, bigarren eta hirugarren urteetan 3.500 euro arte, 2.500 euro arte laugarren urtean, eta, 1.500 euro arte bosgarrenean.
Horretaz gain, jakinarazi dute lagunduko dituztenak proiektu berriak, eskualdatu direnak edota birkotatu direnak direla –birkokatzeak kontsideratzen dira kaletik zuzeneko sarbiderik ez duen lokal batetik sarbidea duen batera aldatzea edo azalera handiko guneetatik herrigunera lekualdatzea–.
Gainera, Elizalde-Altzibar ardatza sustatuko dute, horiek baitira “merkataritza eta negozio txikiek tradizionalki eta gaur egun ere presentzia handiena duten herriko eremu nagusiak, elkarri jarraikortasun funtzional eta geografikoa ematen dioten herriko auzo gune handienak”.
Azkenik, diote laguntza hori urtean zeharreko gastu orokorrentzako dela, hala nola, egitasmoa abiarazteko hasierako gastuak, alokairua, erosketa, altzari edo makinaria erostea, web orriaren diseinua, marketin gastuak….
Iaz deialdi horrek bederatzi onuradun izan zituen, eta partidaren %85a erabili zuten, alegia, 35.000 eurotatik 29.400 euro.
Negozio txikien sarea sendotzea, herritarrei beharrak auzoan bertan asetzeko aukera ematea eta auzoak biziberritzea dira laguntzen helburuak.
Auzoaren arima egitasmoarekin bateragarria
Auzoaren arima Oarsoaldeko Udalek sustatu, Oarsoaldeko Garapen Agentziak kudeatu eta Eusko Jaurlaritzak finantzatzen duen egitasmoa da, eta haren helburua da ekintzaileei aholkularitza eta laguntza eskaintzea, lokal hutsen jabeak identifikatzea eta pizgarriak eskaintzean.
Oiartzunen hiru lokal huts daude identifikatuta, denak Altzibarren, eta diote zenbait ekintzailek adierazi dutela bertan zerbait martxan jartzeko nahia.
Aipatutako diru laguntza horiek udaletxeko Herritarren Arreta Zerbitzuko bulegoan edo webgunean bertan eska daitezke, eta horretarako azken eguna abenduaren 31 izango da.
