Uztailaren 12an ospatuko dute Arditurri eguna
Bisita gidatuak, jolasak, erakusketak, tailerrak edota Arditurri-3 erromatar garaiko meatze galeriara bisita gidatuak izango dira egun horretan.
Urtero bezala, aurtengoan ere ez du hutsik egin Arditurri Egunak; izan ere, Oiartzungo Udalak eta Gipuzkoanatura fundazioak elkarlanean egitaraua osatu dute egun horretarako herriko eta inguruetako familiek egun eder bat igaro dezaten naturan murgilduta.
Uztailaren 12an izango da hitzordua, eta 10:30ean hasiko dute ospakizuna, 14:00ak bitartean doako bisitak egingo baitituzte Arditurriko meategira. Aurten, gainera, bi aukera eskainiko dituzte: oinarrizko bisita eta bisita sakona. Baina, hori gutxi balitz, Arditurri-3 erromatar garaiko meatze galeriara sartzeko aukera emango zaien bertaratzen diren 14 urtetik gorakoei.
Abaraxka ludotekaren eskutik haur eta gazteentzat jolasak ere izango dira, bai eta Mineralen bila bisita gidatua ere. Halaber, Luberri museoak fosil erakusketa bat jarriko du Arditurrin.
Horretaz gain, hegazti askatzea ere egingo dute goizean zehar. Hitzordu horretan, hain justu, Gipuzkoako Foru Aldundiaren Basabizi zentroan fauna jasotzeko, sendatzeko eta berreskuratzeko egiten den lana ezagutaraziko dute, eta zenbait hegazti ikusteko aukera ere egongo da.
Azkenik, antolatzaileek azpimarratu dute goiz osoan zehar janari eta edari zerbitzuaz gain, zuzeneko musika ere egongo dela.
Informazio gehiagorako idatzi mezu elektroniko bat, edo deitu 943 49 42 48 zein 688 89 50 68 zenbakietara.
Egitaraua
- 10:30-14:00. Meategira oinarrizko eta sakoneko bisita.
- 11:00-12:00. Arditurri-3 erromatar garaiko meatze galeriara bisita gidatua.
- 10:00-14:00. Fosilen erakusketa Luberriren eskutik.
- 11:00-14:00. Jolasak eta tailerrak Abaraxka ludotekaren eskutik.
- 12:00. Mineralen bila irteera gidatua.
- 12:45. Hegazti askatzea.
