Xorrola, Argitturi energia kooperatiba eta Arraguako etxebizitza berriak hizpide osoko bilkuran
Xorrola berria erostea, gizarte larrialdietako aurrekontua handitzea eta udala Argitturri energia kooperatibako bazkide egitea onartu dute, besteak beste, ekaineko osoko bilkuran.
Asteon egin dute ekaineko osoko bilkura, eta hemeretzi gai izan dituzte bertan aztergai, eta besteak beste, gizarte larrialdietako aurrekontua handitzea, Arraguako etxebizitza berrien eraikuntzari ekitea eta udala Argitturri energia kooperatibako bazkide egitea onartu dituzte ahoz batez.
Horretaz gain, Xorrola garraio zerbitzuaren eta horniduraren kontratazio espedienteari hasiera eman zaiola jakinarazi dute. Ondorioz, ohiko zerbitzua mantentzeaz gain, Xorrola berria erosiko dela diote. “Hornidura epea gehienez ere lau hilabetekoa denez, Xorrola berria udazkenean martxan izatea aurreikusten da. Zerbitzuaren urteko kostua 376.000 eurokoa izango da, eta kontratua urtebetekoa izango da, lau urtez jarraian luzatzeko aukerarekin”.
Hots, gizarte larrialdietako laguntzara bideratutako aurrekontua %40an handituko da. Azaldu dutenez, laguntzak jasotzeko irizpideak betetzen dituzten eskatzaileen kopurua 37tik 59ra pasa da, eta behar horiek ikusita 100.000 eurotik 140.000 eurora handitu da laguntza horretarako diru partida.
Era berean, Arraguako etxebizitza berrien promozioan aurrera egiteko, sustatzailearekin landutako hitzarmena onartu dela ere jakinarazi du udalak. Hartara, hitzarmen horren arabera, eremu osoko etxebizitzen %67,7 etxebizitza babestuak izango dira. Finean: babestutako 18 eta tasatutako 72 etxebizitza izango dira salmentarako, eta alokairu sozialeko etxebizitzak %46 izango dira.
Azkenik, udala herriko Argitturri energia kooperatibo kide izango da “Europako, Espainiar Estatuko eta Euskal Autonomia Erkidegoko legediek hala sustatzen dutelako eta, batez ere, Oiartzungo Klima eta Energia Jasangarriaren Tokiko Planarekin bat egiten duelako”.
