Azken Ostiraletatik, azkena
Atzo egin zuten Azken Ostirala dinamikaren barruko azken mobilizazioa Errenteria-Oreretan. Beste era bateko iniziatibak landuko ditu Sarek aurrerantzean.
Atzoko talde argazkia, Herriko Plazan.Oreretako Sare Aurretik pandero eta trikitixa doinuak; ondoren Etxera lelodun bandera handia; gero herritarrak: gazteak, haurrak, helduak, adinekoak… Azkenekoz egin zuten atzo Azken Ostirala. Azkenekoz eman zuten Erdigunetik bira Sarek eta Etxerat-ek antolatutako martxan oreretarrek, euskal errepresaliatuen auzia kalera ateratzeko. Oraindik ere euskal preso, iheslari eta deportatuak badaude; baina beste era batera izango da haien ondoan Sare aurrerantzean. Jarduteko era aldatzea erabaki baitu: “ 2014an Sare sortu zenean zegoen espetxeetako testuingurua eta gaur egun dagoena nabarmen aldatu dira”.
150 bat izan ziren atzokoan martxarekin bat egin zutenak. Herriko Plazan hasi, eta bertan bukatu zuten azkena izan zen Azken Ostirala. Txalapartariak, abeslariak eta familia argazkia ere izan ziren. Beti bezala, errepresaliatuen alboan izan ziren, herrikoak, eta Euskal herrikoak.
Elena Mendia Epelde eta Josu Galarraga Arregi sarekideekin hitz egin zuen HITZAk atzokoaren aurretik. “Ibilbidearen eta egungo egoeraren gaineko hausnarketa eginda hartu da dinamika soziala aldatzeko erabakia”, azaldu zuten bi kideek, eta argi azaldu dinamika nazionalari eragingo diola erabaki horrek. Geltokiz geltoki ari direla bidea egiten jarri zuen nabarmen Mendiak, “luzea oso”.
Eragile eta herritarrengan jarri dute fokua Sareko kideek, errepresaliatuan sostengurako jardunean motorra izan direlako: “Aniztasun eta konplizitatearen ikur bilakatu da Sare herrian, ideologia askotariko jendearengana heldu gara eta gure aldarriekin bat egitea lortu dugu. Lortu den guztia gizarte mugimenduari esker izan da”. Hori horrela, garrantzitsu eman du Galarragak horiek adi egotea sor daitezkeen presoen aldeko mobilizazioetara, parte hartzeko: “Eskerrak eman nahi dizkiegu errepresaliatuen eskubideen defentsaren alde batu diren eragile eta herritarrei. Aurrerantzean ere sor daitezkeenetara adi egoteko eskatu nahi diegu”.
Atzokoa bukatuta indarrak urtarrileko manifestazio handira begira jarriko dituzte, “azkena izatea nahi da, eta bide horretan goaz”. Garrantzitsua da haientzat berez urtero handia den manifestazioa inoiz baino handiagoa izatea, “erakusteko etxean nahi ditugula errepresaliatu guztiak”.
