Lezoko herrigintzara zabalik den lau solairuko etxe urdina
Tiñelu elkartearen Ibai Ondo eraikina 11 eragilek erabiltzen dute era iraunkorrean urtean zehar, eta dozenaka dira han egiten diren bestelako jarduerak. Biharko (larunbata) auzolanerako deia egin du elkarteak, eraikina txukuntzeko.
Ibai Ondo erakina, joan den larunbateko argazkian. Oarsoaldean ez da Lezoko Ibai Ondo bezalakorik. Izan daitezke udalek kudeatutako antzeko espazioak, baina herri bateko elkarte jakin batek kudeatutakoak ez. Tiñelu elkartearena da, eta bertako lau solairuetako instalazioak edonork eska eta erabil ditzake. Herrira zabalik denez, Lezoko eragileek erabilera handia ematen diote. Horregatik, baina, beti izaten da zer txukundu edo egokitu. Hala, auzolanera deitu ditu Tiñeluk larunbaterako (biharko 10:00etatik) espazioaren erabiltzaileak nahiz nahi duten guztiak, bi orduz-edo txukun uzteko. Bukatzean mokadutxoa jateko tartea, indarberritzeko.
Tiñelu elkarteko bazkide eta Ibai Ondoko koordinazioan aritzen den Iñigo Esnaolak zehaztu du urtean zehar era iraunkorrean 11 eragilek erabiltzen dutela etxe urdina, baina han egiten diren jarduera puntualak dozenaka direla. Doan erabil daiteke, eta eskaera Tiñeluren webgunetik egin behar da; funtzionamendurako arau batzuk daude, eta horiek errespetatu egin behar dira. «Etxearen gaineko jarraipena egiteko lantalde bat dugu. Baina tarteka auzolanak egiten ditugu beharrezkoak diren konponketak edo garbitze lanak egiteko», azaldu du. Badute erretiratuen «fundamentu handiko» talde bat ia egunero bertan aritzen dela mantenu lanak egiten.
Komunitatea sortzeko baliabidea da, baloreetan oinarrituta eta irizpide aurrerakoiekin. «Tiñeluk eta Ibai Ondok horren zati izan nahi dute. Horretarako ateak irekita ditugu. Garai latzak datoz, eta komunitatetik eta herrigintzatik herria eta nazioa eraikitzen jarraitzea inoiz baino beharrezkoago da».
Lau solairukoa da etxe elegantea. Lehena espazio zabala da, «kontzertu txikiak-eta egiteko aproposa 40-50 pertsonako edukierarekin. Barratxoa ere jar daiteke. Deia egin nahi diegu inguruko kultur taldeei-eta espazio hori balia dezaten», Esnaolak. Lehenean sukaldea eta elkarte antzekoa dago, eta adibidez, hainbat herri bazkari edo afari egiten dira han. Hirugarren solairuak wifidun batzar areto handia du, eta han, esaterako, azterketa garaian ikasten izaten dira ikasle lezoarrak; goiko pisua bilera gela txikiagoa da.
Enbargotik aske
1993an erosi zuen Tiñelu elkarteak Ibai Ondo, «lan politikoa egiteko eta Lezoko herrigintzari espazio bat eskaintzeko». Erosi ondoren, konpondu eta txukundu egin zen. «Baina 2002. urtean, 35/02 sumarioaren barruan, Baltasar Garzon epailearen aginduz urte luzetako enbargoa etorri zen. Etxea geldialdi egoeran geratu zen orduan».
2021. urtera joan behar da Ibai Ondoren herri berrerabileraren aro berria ezagutzeko. Orduko hartan gelditu zen Tiñelu elkartea prozesu judizial hartatik kanpo, eta 1993an hasitako bideari berrekitea erabaki zuen orduan elkarteak: erabaki horren lehen ondorioa izan zen etxea auzolanean barrutik eta kanpotik berritzea, eta horrekin batera funtzionamendua antolatzea herrigintzari etxea erabiltzeko aukera zabalduz.
