Turismo bulegoek ordutegia zabaldu dute
Uda hastearekin batera, Errenteria-Oreretako, Oiartzungo eta Pasaiako bulegoek ordutegia zabalduko dute uztailan eta abuztuan.
Bizarain mendia eta San Marko gotorlekuaren panoramika bat.Gipuzkoako Foru Aldundia Uda hastearekin batera, Oarsoaldeko turismo bulegoek ordutegia zabalduko dute uztailan eta abuztuan, eta udako informazio guneen irekierarekin zerbitzua indartuko dute. Urte osoan irekita dauden Errenteria-Oreretako eta Pasaiako bulegoek ordutegi zabalagoa izango dute abuztuaren 31ra arte: 09:30etik 14:30era eta 15:30etik 18:30era bitartean artatuko dituzte herritarrak, egunero.
Bestalde, irailaren 30era arte, Errenteria-Oreretako San Marko Gotorlekua zabalik egongo da asteazkenetik igandera, baita jaiegun eta zubietan ere, 10:00etatik 14:00etara eta 16:00etatik 18:00etara. Gune horretan bisita gidatuak egiten dituzte.
Hilaren 1ean, gainera, Arizmendienea Etxe Museoan kokatuta dagoen Oiartzungo turismo bulegoa ireki zen. Abuztuaren 31ra arte egongo da zabalik, eta egunero jasoko ditu herritarrak, 09:30etik 14:30era eta 15:30etik 18:30era. Horrez gain, Arizmendienea XVII. mendeko eraikina ezagutzeko bisita gidatuak eskainiko dituzte doan: ostiraletan 11:00etan (euskaraz, gaztelaniaz edo frantsesez) eta larunbat eta igandetan 10:00etan eta 12:00etan (euskaraz) eta 11:00etan eta 13:00etan (gaztelaniaz). Bertara joateko beharrezkoa da aurrez erreserba egitea 943 50 89 13 telefono zenbakira deituta edo helbide elektronikora mezua idatzita.
Azkenik, Errenteria-Oreretako Listorreta-Barrengoloia naturaguneko informazio puntuak ateak ireki zituen atzo, eta urriaren 12ra arte egongo da zabalik. Ostegunetan, 08:30etik 14:00etara, eta ostiral, asteburu eta jai egunetan 08:30etik 14:00etara eta 15:00etatik 18:30era bitartean artatuko dituzte herritarrak. Naturaguneen eta mendi ibilbideen gaineko informazioa jaso ahal izango da bertan.
Informazio puntu guztietan, plan, proposamen eta ideia askoren berri edo informazio pertsonalizatua jasotzeko aukera izango dute bisitariek, baita eskualdeko bisita gidatu eta turismo baliabide gehienetarako erreserbak egiteko aukera ere. Errenteria-Oreretako eta Pasaiako turismo bulegoetan, gainera, MUGI garraio txartel anonimoa eskuratzeko edo anonimoa zein pertsonala kargatzeko aukera egongo da.
