Isuna udalari, erabat erabilezin eta arriskutsu zen Fanderiako igerilekuko estalkia aldatzeagatik
Estalki mugikor zaharrak langileen eta erabiltzaileen artean segurtasun arazoak sor zitzakeelako finko batengatik aldatu zuen udalak. Uraren Euskal Agentziak jarri dio isuna udalari, 37.500 eurokoa.
Honakoa da Fanderiako igerilekuaren egungo estalkia.Errenteriako Udala Errenteriako Udalak jakinarazi du Uraren Euskal Agentziak 37.500 euroko isuna jarri diola Fanderiako igerilekuko estalkia aldatzeagatik. 2022an hartu zuen udal gobernuak estalki hori aldatzeko erabakia, erabat erabilezin eta suntsitua zelako denboraren poderioz; estalki mugikor hura, finko batekin ordeztu zuten. “Aldaketa aurretik egindako txosten tekniko batek ohartarazi zuen estalki mugikorraren egoerak segurtasun arriskuak sortzen zituela. Langileen eta erabiltzaileen segurtasuna bermatzeko udalak berehala idatzi zuen berritze proiektua, eta obrak lizitatu”. Lanak 2023ko irailean hasi, eta 2024ko otsailean bukatu ziren lan horiek. “Ordutik igerilekuak normaltasunez funtzionatzen du, neguan estalitako igerilekua da, eta udan aire zabalekoa”.
Obrak horiek bukatu zirenean, ordea, Uraren Euskal Agentziak jakinarazi zuen ez zela horiekin ados, eta zehapen espedientea zabaldu zuen. 37.500 euroko isuna jarri eta estalkia aurreko egoerara lehengoratzeko agindu zuen, “kostaldeei buruzko indarrean den araudia urratu zela iritzita”, zehaztu du udalak.
Zehapen espediente horren aurrean auzi errekurtsoa aurkeztu zuen udalak. Hala, epaitegiak maiatzaren 26an kautelaz erabaki zuen estalkia aurreko egoerara lehengoratzeko agindua, auzia behin betiko ebatzi arte. Neurri horrek ez du eraginik ezarritako isunean. Beraz, isuna jada irmoa denez, hura ordaintzea erabaki du udalak. “Dena dela, epaitegietan bere jarduna defendatzen eta herritarren interesak babesten jarraituko du udalak”.
